नेपाली ढाकाको डोरो, हाम्रो पहिचान (कविता)

• याम बहादुर थापा मगर

नेपाली पोसाक केवल शरीर ढाक्ने वस्त्र होइन ।
यो हाम्रो आत्माको प्रतीक हो,
इतिहास र माटोको सुगन्ध हो ।
ढाकाको डोरोमा हिमालको चिसोपन,
तराईको न्यानोपन र पहाडको गर्व मिसिएको छ ।
हरेक धागोले कथा बोल्छ ।
आमाको मायाको, छोरीको भविष्यको ।

तर आज विदेशी कपडाको चमकले
हाम्रो मौलिकता ढाक्दै छ।
बजारमा आयातित पोसाकको भीडमा
हाम्रो नेपाली पहिचान हराउँदै छ ।
के हामी आफ्नै ढाका, गुन्यू चोली
र टोपी पुनः गर्वका साथ धारण गर्न सक्दैनौँ?
सकिन्छ — जब हामी तिनलाई “फेसन” होइन,
नेपाली मौलिक संस्कार ठान्छौँ ।

हाम्रो पोसाकमा प्रकृतिको लय छ ।
हावाको सास, नदीको ताल र खेतको सुवास।
सिप र प्रविधिलाई एकसाथ अघि बढाउँदा
नेपाली ढाकाको रङ विश्वको मञ्चमा झल्किन सक्छ,
गुन्यू चोलीको रूप विश्वले माया गर्न सक्छ ।

हाम्रो धागोले आत्मविश्वास बुनोस्,
ढाकाको सौन्दर्य विश्वभर फैलियोस् ।
र हरेक नेपालीले गर्वका साथ भनुन्  ।
यो मेरो पोसाक हो, यो मेरो पहिचान हो ।

– बागलुङ नगरपालिका १०, भकुण्डे, धौलेचउर, बागलुङ