बागलुङ, २४ फागुन । तेस्रो जेसीज कप फुटबल प्रतियोगिताको उपाधि ग्रेस गुराँस गुठी युनाईटेडले जितेको छ ।
बाङ्गेचौर खेलमैदानमा शनिबार सम्पन्न फाइनल खेलमा गुठीले ट्राइब्रेकरमा ४–३ गोलअन्तरले साविक विजेता बागलुङ सुधार केन्द्रलाई पराजित गर्दै उपाधि चुमेको हो ।
प्रतिस्पर्धात्मक खेलको पहिलोहाफ गोलरहित बराबरीमा टुंगिएपनि दोस्रो हाफमा गुठीले गोल गर्दै अग्रता लिएको थियो । खेलको ५६ औं मिनेटमा गुठीका निराजन खत्रीले गोल गरेर टिमलाई अग्रता दिलाएका थिए । १ गोलले पछि परेको एक मिनेटमा सुधार केन्द्रका विदेशी खेलाडी अबेका रिचर्डले सुन्दर गोल गर्दै खेल बराबरीमा फर्किएका थिए ।
निर्धारित ९० मिनेटमा १–१ गोलको बराबरी भएपछि १४ मिनेटको अत्तिरिक्त समय थप भएको थियो । थपिएको अतिरिक्त समयमा कुनै गोल नहुँदा खेल टाइब्रेकरमा धकेलिएको हो ।
ट्राइब्रेकरमा गुठीका सम्राट लिम्बु, जेनिश प्रजापति, विविध थापा र मनिष थकालीको प्रहार गोलमा परिणत हुँदा किरण थापाको प्रहार गोलबारमा लाग्दै बाहिरियो ।
सुधार केन्द्रका राहुल गुरुङ, निशान थापा र सुशिल लामाको प्रहार गोलमा परिणत हुँदा रोशन क्षेत्रीको प्रहार गुठीका गोलरक्षक सौगात खड्काले रोकेका थिएभने प्रशन्न श्रेष्ठको प्रहार गोलबारमा लाग्दै बाहिरिदा दोस्रो पटक उपाधि उचाल्नबाट बन्चित भयो ।
उपाधि जितेको उपाधि जितेको ग्रेस गुराँस गुठी युनाईटेडले २ लाख रुपैयाँ सहित ट्रफी, मेडल र प्रमाणपत्र प्राप्त गर्यो । उपविजेतामा चित्त बुझाएको सुधार केन्द्रले १ रुपैयाँ, ट्रफी, मेडल र प्रमाणपत्र प्राप्त गरेको छ । फाइनल खेलको प्लेयर अफ दी म्याच गुठीका गोलरक्षक सौगात खड्का घोषित भए ।
प्रतियोगिताको सर्वोत्कृष्ट खेलाडी बागलुङ सुधार केन्द्रका कप्तान निशान थापा घोषित भएका छन् । उनले नगद ५ हजार रुपैयाँसहित ट्रफी प्राप्त गरेका छन् । यस्तै उत्कृष्ट गोलरक्षक गुठीका सौगात खड्का, उत्कृष्ट डिफेन्डर गुठीका सन्दिप छन्त्याल, उत्कृष्ट मिडफिल्डर सुधार केन्द्रका सुशिल लामा र उत्कृष्ट फरवार्ड सुधार केन्द्रका रोशन क्षेत्री र प्रतियोगितामा ३ गोल गरेका गुठीका मनिष श्रेष्ठ सर्वाधिक गोलकर्ता घोषित भए । उनीहरुले नगद ३–३ हजार रुपैयाँ सहित ट्रफी प्राप्त गरे । यस्तै म्याग्दी जिल्ला फुटबल संघ अनुशासित टिम घोषित हुँदै नगद ५ हजार रुपैयाँ सहित ट्रफी प्राप्त गर्यो ।
बागलुङ जेसीजले आयोजना गरेको प्रतियोगितामा ११ टिमको सहभागिता रहेको थियो । प्रतियोगिताका विजेता टिम र खेलाडीलाई गण्डकी प्रदेशका सदस्य दिपेन्द्र बहादुर थापा, जिल्ला फुटबल संघका अध्यक्ष जय राजभण्डारी, बागलुङ जेसीजका अध्यक्ष सुशान्तकृष्ण श्रेष्ठ लगायतले पुरस्कार वितरण गर्नुभएको थियो ।
