बागलुङ । पावर फिटनेस क्लब बागलुङ जिल्ला लिग फुटबल प्रतियोगितामा फाइनलमा प्रवेश गरेको छ । पावर फिटनेसले शुक्रबार रुद्रेपिपल युवा क्लबलाई २–० गोलअन्तरले पराजित गर्दै फाइनलमा प्रवेश गरेको हो । शुक्रबारको जितसँगै पावर फिटनेसले तीन खेलमा दुई खेलमा जित र एक खेलमा बराबरी खेल्दै ७ अंकसहित समुह ‘क’को शीर्ष स्थानमा रहँदै फाइनल प्रवेश गर्यो ।
पावर फिटनेसको फाइनल यात्राका लागि खेलको २७ औं मिनेटमा वरदान थापाले गोल गर्दै अग्रता दिलाएका थिए । टिटश विकले ५८ औं मिनेटमा गोल गर्दै फाइनल यात्रा सुनिश्चित गरेका थिए । पावर फिटनेसले आगामी आइतबार हुने फाइनल खेलमा समूह ‘ख’को शिर्ष स्थानमा रहने टोलीसँग प्रतिस्पर्धा गर्नेछ ।
यस्तै शुक्रबार नै भएको समुह ‘क’को खेलमा बागलुङ कालिका युवा क्लब (बागलुङ सुधार केन्द्र)ले कालिका भगवती युवा क्लबलाई ४–२ गोलअन्तरले पराजित गरेको छ ।
बागलुङ कालिकाको जितका लागि खेलको ३० औं मिनेटमा अर्जुन खत्रीले गोल गरेका थिएभने मनिक श्रेष्ठले खेलको ३२ औं र अतिरिक्त समयको दोस्रो मिनेटमा गोल गरेका थिए । यस्तै ३५ औं मिनेटमा पुकार फगामीले गोल गरे । कालिका भगवतीका लागि खेलको ३७ औं र ५६ औं मिनेटमा रोशन लामिछानेले दुई गोल गरेका थिए । बागलुङ कालिकाले तीन खेलमा दुई जित र एक हार सहित ६ अंकको साथ समुह ‘क’को दोस्रो स्थानमा रहेको छभने कालिका भगवती युवा क्लब दुई हार र एक बराबरी सहित १ अंकको साथ समुहको पुछारमा रह्यो ।
शनिबार लिगको समुह ‘ख’का अन्तिम दुई खेल हुनेछन् । शनिबार समुह ‘ख’को शिर्ष स्थानमा रहेको बाल जीवन खेलकुद क्लब (चिल्ड्रेन लाईफ)ले रेलिगेशन जोनमा रहेको रामरेखा फुटबल क्लबसँग खेल्नेछ । चिल्ड्रेन लाईफले जित वा बराबरी खेलेमा फाइनल प्रवेश गर्नेछ । दुई खेलमा नमिठो हार व्यहोरेको रामरेखाले रेलिगेशनबाट जोगिन जित्नुपर्ने बाध्यतामा रहेको छ । यस्तै शनिबार समुह ‘ख’को अन्तिम खेल गुठी युनाईटेड क्लब र विर गोर्खाली युवा क्लब विच हुनेछ ।
