बागलुङ । बागलुङ जिल्ला लिग फुटबल प्रतियोगितामा बिहिबार रुद्रेपिपल युवा क्लब, विर गोर्खाली युवा क्लब र बाल जीवन खेलकुद क्लब (चिल्ड्रेन लाईफ स्पोर्टस् क्लब) विजयी भएका छन् ।
बिहिबार भएको पहिलो खेलमा रुद्रेपिपल युवा क्लबले कालिका भगवती युवा क्लबलाई १–० गोलअन्तरले पराजित गर्यो । प्रतिस्पर्धात्मक खेलको ६५ औं मिनेटमा ऋषि बगजाईले गरेको निर्णायक गोलको मद्धतमा रुद्रेपिपलले लिगमा पहिलो जित निकाल्यो । रुद्रेपिपलले प्रतियोगितामा एक जित र एक हार सहित तीन अंकको साथ समुह ‘क’को तेस्रो स्थानमा उक्लिएको छ ।
यस्तै बिहिबार भएको दोस्रो खेलमा विर गोर्खाली युवा क्लबले रामरेखा फुटबल क्लबलाई ३–१ गोलअन्तरले पराजित गर्दै प्रतियोगितामा पहिलो जित निकाल्यो । विर गोर्खालीलाई पहिलो जित दिलाउन सन्देश तामाङले खेलको तेस्रो मिनेटमा गोल गर्दै अग्रता दिलाएका थिए । तामाङले खेलको २६ औं र विश्वास थापाले खेलको ४२ औं मिनेटमा गोल गर्दै जित सुनिश्चित गरे । रामरेखाको लागि खेलको ४९ औं मिनेटमा अविशेक केसीले सान्तोना गोल गरे ।
विर गोर्खालीले दोस्रो खेलमा पहिलो जित निकाल्दै तीन अंकका साथ समुह ‘ख’को अंक तालिकाको तेस्रो स्थानमा रहेको छ । लगातार दोस्रो खेलमा पराजित भएको रामरेखा रेलिगेशन जोनमा परेको छ ।
यस्तै बिहिबार भएको समुह ‘ख’को हेभिवेट खेलमा बाल जीवन खेलकुद क्लब (चिल्ड्रेन लाईफ स्पोर्टस् क्लब)ले गुठी युनाईटेड क्लबलाई ३–० गोलअन्तरले पराजित गर्दै समुहको शीर्ष स्थानमा उक्लेको छ । चिल्ड्रेन लाईफलाई लिगमा दोस्रो जित दिलाउन मिलन मगरले खेलको ३६ औं मिनेटमा, निश्चल महतले ५५ औं मिनेटमा र सनम केसीले ७० औं मिनेटमा गोल गरेका थिए ।
दोस्रो जितसँगै चिल्ड्रेन लाईफले ६ अंकको साथसमुह ‘ख’को शीर्ष स्थानमा रहँदै फाइनल प्रवेशको सम्भावनालाई प्रवल बनाएको छ । गुठीको दुई खेलमा एक जित र एक हार सहित तीन अंकसहित समुहको दोस्रो स्थानमा रहेको छ ।
लिग अन्तरगत शुक्रबार समुह ‘क’का अन्तिम दुई खेल हुनेछन् । शुक्रबार पहिलो खेल बागलुङ कालिका युवा क्लब (बागलुङ सुधार केन्द्र) र कालिका भगवती युवा क्लब विच हुनेछभने दोस्रो खेल रुद्रेपिपल युवा क्लब र पावर फिटनेश क्लब विच हुने आयोजक बागलुङ जिल्ला फुटबल संघका अध्यक्ष जय राजभण्डारीले जानकारी दिए ।
