बागलुङ, ३ माघ । बागलुङको गल्कोट नगरपालिका—२ नरेठाटी घर भएकी बन्दना सुनवार अमेरिकाबाट नेपाल आएको केही दिन मात्र भएको थियो ।
केही बर्षदेखि अमेरिका बस्दै आएकी बन्दना बिरामी भएर काठमाडौंको अस्पतालमा उपचाररत हजुरआमालाई भेट्नको लागि केही दिन अघि नेपाल आएकीहुन । बन्दना आइतबार बिहान पोखरामा रहेका आफन्त र साथीहरुलाइ भेट्नको लागि खबर नगरी ‘सरप्रराइज’ दिन यति एयरलाइन्सको जहाजमा पोखराको लागि उडेकी थिइन । तर, पोखरा नपुग्दै उनी चढेको विमान दुर्घटनामा पर्यो । पोखरामा पाइला राख्न नपाउँदै उनी संसारबाट बिदा भइन ।
उनीसहित ६८ यात्रु सवार रहेको यति एयरलाइन्सको विमान आइतबार बिहान पोखरा विमानस्थलमा अवतरणका क्रममा सेती खोँचमा दुर्घटनाग्रस्त भयो । पुरानो एयरपोर्टको आकाश पुग्न १ मिनेट पनि नपुग्दै जहाज आकाशमै कोल्टियो र सेतीनदीको खोँचमा खसेको थियो ।
‘बन्दना नेपाल आएको छ भनेर हामीले त बल्ल आज (दुर्घटनाको दिन) थाहा पाएको हो, ऊ जहिले पनि सरप्राइजदिएर आउँछे,’ उनकी दिदी जेमी सुनारले आँशु पुछ्दै भनिन, ‘यो कस्तो सरप्राइज हो ।’
बन्दनाको मृत्युको खबरले उनको परिवार अहिले शोकमग्न भएको छ ।
यस्तै, आफ्नी बुहारीलाई जापान पठाउन काठमाडौं गएका बागलुङ नगरपालिका–४ कुडुँलेका शालिकराम आचार्य पनि घर फर्किने क्रममा अब कहिल्यै नफर्किने गरेर अस्ताएका छन । उनले शनिबार बुहारीलाई जापान पठाएर घर फर्किन पोखराको टिकट लिएका ५३ वर्षीय आचार्यको विमान दुर्घटनामा मृत्यु भएको छ ।
