काठमाण्डौ, ०९ असोज । शुक्रबारदेखि बहुप्रतिक्षित चलचित्र प्रेमगीत ३ प्रदर्शनमा आएको थियो । यो चलचित्र नेपाल लगायत विश्वका १ हजार २ सय हलमा एकसाथ प्रदर्शनमा आएको थियो तर, ‘प्रेमगीत ३’ को हिन्दी संस्करण भने विविध प्राविधिक कारण जनाउँदै १० गतेबाट नेपालमा रिलिज हुने भएको छ ।
नेपालसहित भारत, अमेरिका, अस्ट्रेलिया, जापानलगायत विभिन्न देशहरुका १ हजार २ सयभन्दा बढी सिनेमा हलमा यो चलचित्र एकैसाथ प्रदर्शनमा आएको यो चलचित्रको हिन्दी संस्करणलाई लिएर नेपालमा विवादसमेत भएको थियो । जसका कारण सञ्चार तथा सूचना प्रविधि मन्त्रालयले प्रेमगीत ३ को हिन्दी संस्करणलाई पनि नेपाली चलचित्रकै मान्यता दिएको थियो ।
भारत लगायतका विश्वका थुप्रै देशमा हिन्दी भाषामा रिलिज भएको नेपाली फिल्म ‘प्रेमगीत ३’ रिलिजको दोश्रो दिनमै पाइरेसीको सिकार भएको छ । यो फिल्म अनलाइन पाइरेसीमा परेको हो । अनलाइनमा हिन्दी भाषामा तयार भएको फिल्म छ्याप्तछ्याप्ती भेटिन थालेको छ । जसले गर्दा व्यापारमा घाटा हुने देखिन्छ । नेपाली भाषामा मात्र रिलिज हुँदा कहिलेकाही युट्युबमा फिल्म पाइरेसी हुने गरेको थियो । तर, त्यसलाई मेकरले तुरुन्तै हटाउन सक्थे । तर, भारतका चर्चित फिल्महरु पाइरेसी गर्ने अनलाइनहरुबाट पाइरेसी भएका कारण पनि यसलाई हटाउन गाह्रो पर्ने देखिन्छ ।
स्वर्गीय छेतेन गुरुङ र सन्तोष सेनले निर्देशन गरेको चलचित्रमा नायक प्रदीप खड्का, नायिका कृष्टिना गुरुङ तथा सुनिला थापा, सन्तोष सेन, माओत्से गुरुङ, पुस्कर कार्की, प्रेम पुरी, अनुभव रेग्मी, योगिशा खत्री, जीवन भट्टराई, लक्ष्मी बर्देवालगायत कलाकारको अभिनय रहेको यो फिल्म नेपाली भाषामा २ घण्टा १५ मिनेटको भए पनि हिन्दी भाषामा भने जम्मा २ घण्टाको रहेको छ । यो फिल्मले नेपाली बक्स अफिसमा बम्पर व्यापार गरिरहेको छ तर फिल्मले दर्शकबाट भने मिश्रित प्रतिक्रिया पाइरहेको छ ।
अहिले नेपाली चलचित्र ऐना झ्यालको पुतली, झिङ्गेदाउ र बलिउड चलचित्र ब्रह्मास्त्र पनि प्रदर्शन भइरहेका छन ।
