बागलुङ, ३१ भदौ । भारतलाई हराउँदै नेपाल छैटौं महिला साफ च्याम्पियनसिपको फाइनलमा पुगेको छ। शुक्रबार त्रिपुरेश्वरस्थित दशरथ रंगशालामा भएको सेमिफाइनल खेलमा नेपालले भारतलाई १-० गोलले पराजित गरेको हो ।
नेपालका लागि रश्मीकुमारी घिसिङले गोल गरेकी थिइन् । उनले पहिलो हाफको इन्जुरी समयमा गोल गरेकी थिइन् । उनले प्रिती राईको क्रसलाई पेनाल्टी क्षेत्र भित्र संयमित भएर नियन्त्रणमा लिँदै गोल गरिन् ।
यसअघि पहिलो सेमिफाइनलमा बंगलादेशले भुटानलाई पराजित गर्दै फाइनलमा स्थान पक्का गरिसकेको छ । भुटानलाई ८-० हराउँदै बंगलादेश दोस्रो पटक फाइनलमा पुगेको हो ।
फाइनलमा नेपाल र बंगलादेश भिड्नेछ । फाइनल खेल सोमबार हुनेछ ।
