बागलुङ, १ साउन । बागलुङमा खुल्ला फुटसल प्रतियोगिता हुने भएको छ ।
चिल्ड्रेन लाईफ स्पोर्टस् क्लब (जुनियर) बागलुङको आयोजनामा साउन २० र २१ गते खुल्ला फुटसल प्रतियोगिता २०७९ हुने भएको हो ।
प्रतियोगिताका नकआउट चरणमा खेलाइने बताइएको छ । प्रतियोगितामा २०/२५ टिमको सहभागिता रहने आयोजकले अपेक्षा गरेको छ । बर्खाको समयमा खुल्ला मैदानमा फुटबल प्रतियोगिता गर्न सम्भव नभएकोले इनडोर प्रतियोगिताको रुपमा फुटसल प्रतियोगिताको आयोजना गरिएको क्लबका खेलाडी सौगात खड्काले बताउनुभयो ।
प्रतियोगितामा राष्ट्रिय खेलाडीहरु समेत समावेश हुन पाउने आयोजकले जनाएको छ ।
प्रतियोगितामा सहभागिताको लागि ५ हजार ५ सय रुपैयाँ दर्ता शुल्क रहेको क्लबका खेलाडी खड्काले बताउनुभयो । प्रतियोगिताको विजेताले ४१ हजार १ सय ११ रुपैयाँ र उपविजेताले २१ हजार १ सय ११ रुपैयाँ प्राप्त गर्ने आयोजकले जनाएको छ । यस्तै विधागततर्फ उकृष्ट खेलाडी, उत्कृष्ट गोलरक्षक र सर्वाधिक गोलकर्ता समेत पुरस्कृत हुनेछन् ।
