बागलुङ, ४ जेठ । बागलुङ जिल्लाको बागलुङ नगरपालिका, जैमिनी नगरपालिका र बरेङ गाउँपालिकामा पाँच दलिय गठबन्धनका उम्मेदवारहरु विजयी भएका छन् ।
बागलुङ नगरपालिकामा गठबन्धनका साझा उम्मेदवार प्रमुखमा नेपाली काँग्रेसका बसन्त कुमार श्रेष्ठ र उपप्रमुखमा नेकपा माओवादी केन्द्रका राजु खड्का निर्वाचित भएका हुन् । श्रेष्ठले १४ हजार ६ सय ७८ मत प्राप्त गरि निर्वाचित भएका हुन् । उनका निकटतम प्रतिस्पर्धी नेकपा एमालेका जनकराज पौडेलले ८ हजार ८ सय २१ मत प्राप्त गरेका छन् ।
उपप्रमुखमा माओवादी केन्द्रका राजु खड्काले १२ हजार ४ सय २७ मत ल्याएर विजयी भएका छन् । उनका निकटतम प्रतिस्पर्धी राप्रपाका संजय खड्काले ८ हजार ६४ मत प्राप्त गरेका छन् ।
बागलुङ नगरपालिकाको १४ वडा मध्ये १० वटा वडामा गठबन्धनका उम्मेदवार र ३ वटा वडामा नेकपा एमालेका उम्मेदवारहरु विजयी भएका छन् । नेपाली काँग्रेस, नेकपा माओवादी केन्द्र, नेकपा एकीकृत समाजवादी, राष्ट्रिय जनमोर्चा र जनता समाजवादी पार्टी विच भएको चुनावी गठबन्धनमा नेपाली काँग्रेसले वडा नम्बर १, ३, ८, ९, ११, १३ र १४ मा नेपाली काँग्रेस, वडा नम्बर २ र १९ मा नेकपा एकीकृत समाजवादी, वडा नम्बर ४ मा नेकपा माओवादी केन्द्रका उम्मेदवारहरु विजयी भएका छन् । नेकपा एमालेले वडा नम्बर ५, ६ र ७ मा विजयी भएको छ भने वडा नम्बर १२ मा स्वतन्त्र विजयी भएका छन् ।
यस्तै पाँच दलिय गठबन्धनले जैमिनी नगरपालिकाको प्रमुख र उपप्रमुखमा विजयी भएको छ । जैमिनी नगरपालिकाको प्रमुखमा गठबन्धनबाट राष्ट्रिय जनमोर्चाका नर बहादुर पुन र उपप्रमुखमा नेपाली काँग्रेसका हरिहर शर्मा निर्वाचित भएका छन् ।
पुनले ८ हजार ७ सय ५५ मत प्राप्त गरी विजयी भएका हुन् । उनका निकटतम प्रतिस्पर्धी नेकपा एमालेका लिला रानाले २ हजार ८ सय ७३ मत प्राप्त गरेका छन् ।
उपप्रमुखमा नेपाली काँग्रेसका हरिहर शर्माले ९ हजार १ सय ७३ मत प्राप्त गरि निर्वाचित भएका छन् । उनका निकटतम प्रतिस्पर्धी नेकपा एमालेकी उषा पौडेलले २ हजार ६ सय ३६ मत प्राप्त गरेकी छिन् ।
जैमिनी नगरपालिकाको १० वटा वडा मध्ये गठबन्धनले ९ र नेकपा एमालेले १ वटा वडामा विजयी भएको छ । गठबन्धनबाट नेपाली काँग्रेसले वडा नम्बर १, २, ५, ७ र ८ मा विजयी भएको छभने माओवादी केन्द्रले वडा नम्बर ३ र ६ तथा राष्ट्रिय जनमोर्चाले वडा नम्बर १० मा विजयी भएको छ । नेकपा एमालेले वडा नम्बर ९ मा विजयी भएको छ ।
यस्तै बरेङ गाउँपलिकाको अध्यक्षमा पाँच दलिय गठबन्धनको तर्फबाट राष्ट्रिय जनमोर्चाका कृष्ण प्रसाद शर्मा र उपाध्यक्षमा नेपाली काँग्रेसका दिलिप कुमार पुन निर्वाचित भएका छन् ।
शर्मा अध्यक्षमा दोस्रो कार्यकालको लागि निर्वाचित भएका हुन् । उनले ३ हजार ६ सय १ मत प्राप्त गरि विजयी भए । उनका निकटतम प्रतिस्पर्धी नेकपा एमालेका प्रदिप थापाले २ हजार २ सय ३२ मत प्राप्त गरेका छन् ।
उपाध्यक्षमा गठबन्धनबाट नेपाली काँग्रेसका दलिप कुमार पुनले ३ हजार ६ सय ८२ मत प्राप्त गरि विजयी भएका हुन् । उनका निकटतम प्रतिस्पर्धी नेकपा एमालेकी दुर्गा कार्की थापा क्षेत्रीले १ हजार ९ सय ५५ मत प्राप्त गरेकी छन् ।
५ वटा वडा रहेको बरेङ गाउँपालिकामा पाँच दलिय गठबन्धनले ४ र नेकपा एमाले १ वटा वडामा विजयी भएका छन् । गठबन्धनबाट नेपाली काँग्रेसले वडा नम्बर ४ र ५ मा विजयी भएको छभने राष्ट्रिय जनमोर्चा वडा नम्बर १ र २ मा विजयी भएको छ । वडा नम्बर ३ मा नेकपा एमाले विजयी भएको छ ।
