बागलुङ, १५ मंसिर । मध्यपहाडी लोकमार्गको बागलुङ–अक्षेत्रे खण्ड अन्तरगत काठेखोलाको खहरेमा जीप दुर्घटना हुँदा एक जनाको मृत्यु भएको छभने तीन जना घाईते भएका छन् ।
विहुँबाट बागलुङ बजार आउँदै गरेको बा १८ च ५६७७ नम्बरको रातो प्लेटको पिकअप जीप बुधबार विहन ५ बजे दुर्घटना हुँदा बागलुङ नगरपालिका–७ का ४५ बर्षिय श्याम शर्माको मृत्यु भएको जिल्ला प्रहरी कार्यालय बागलुङका सूचना अधिकारी इकवाल हवारीले जानकारी दिनुभयो । शर्माको घटनास्थलमै मृत्यु भएको हवारीले बताउनुभयो ।
उहाँले दुघर्टना परी बागलुङ नगरपालिका–१ रामरेखाका ४० बर्षिय टकबहादुर बोहोरा, ४४ बर्षिय दिनेश गिरी र २५ बर्षिय अजय शिवाकोटी घाईते भएको बताउनुभयो । घाईते तिनै जनाको धौलगिरी अस्पताल बागलुङमा उपचार भैरहेको छ ।
जीपका चालक फरार रहेको प्रहरीले जनाएको छ । जिप सडकबाट ३० मिटर तल खसेको छ । दुर्घटनाको कारण भने खुलेको छैन् ।
