काठमाडौं, ३१ असार । नेपालले सन् २०२८ को आईसीसी टी–२० विश्वकपका लागि अन्तर्राष्ट्रिय क्रिकेट परिषद् (आईसीसी) ले सार्वजनिक गरेको नयाँ छनोट प्रणालीअनुसार नेपालले सिधै ग्लोबल छनोट मा प्रतिस्पर्धा गर्ने भएको हो।
सन् २०२६ को टी–२० विश्वकपमा सहभागी भए पनि स्वतः विश्वकपमा स्थान बनाउन नसकेका टोलीहरूलाई ग्लोबल छनोटमा सिधा प्रवेश दिने निर्णयानुसार नेपालले यो अवसर पाएको हो।
नयाँ संरचनाअनुसार ग्लोबल छनोटमा नेपालसहित २०२६ विश्वकप खेलेका केही टोली रहनेछन् भने अफ्रिका, एसिया र युरोपबाट दुई–दुई तथा अमेरिका र पूर्वी एसिया–प्रशान्त (ईएपी) क्षेत्रबाट एक–एक टोली क्षेत्रीय छनोट पार गरेर थपिनेछन्।
ग्लोबल छनोटपछि प्रत्येक क्षेत्रबाट उत्कृष्ट एक–एक टोली र समग्र प्रदर्शनका आधारमा थप तीन टोली गरी कुल सात टोली ले टी–२० विश्वकप २०२८ मा स्थान बनाउनेछन्। आईसीसीले छनोटका लागि न्यूनतम प्रदर्शन मापदण्ड पनि लागू गर्ने जनाएको छ।
यसअघि विश्वकपका लागि एसिया, ईएपी, युरोप, अमेरिका र अफ्रिकामा छुट्टाछुट्टै क्षेत्रीय छनोट आयोजना हुने व्यवस्था थियो। अब भने ग्लोबल छनोट प्रणाली पुनः लागू गरिएको छ।
आईसीसीले टी–२० विश्वकपको प्रतियोगिता ढाँचामा पनि परिवर्तन गरेको छ। उक्त प्रस्ताव आईसीसीको सम्मेलनबाट पारित भइसकेको भएपनि अन्तिम स्वीकृति भने आगामी नोभेम्बरमा हुने बैठकपछि दिइनेछ।
