बागलुङ, २१ कार्तिक । नेकपा एमालेका अध्यक्ष तथा पूर्व प्रधानमन्त्री केपी शर्मा ओलीले एमाले सरकारले बाहेक अरूले नेपालको गुमेको भूमि फिर्ता ल्याउन नसक्ने बताएका छन्।
एमाले बागलुङले जिल्लाको बुर्तिबाङ बजारमा आयोजना गरेको चुनावी सभालाई (आज) सम्बोधन गर्दै अध्यक्ष ओलीले नेपालको गुमेको भूमि फिर्ता गर्न एमाले सरकारले मात्र सक्ने भएकाले एमालेलाई विजयी गराउनुपर्ने बताए।
दार्चुलामा पुगेर आफूले गुमेको भूमि फिर्ता गर्ने बताउँदा प्रधानमन्त्रीले बन्दुक लगेर सीमामा जानु भन्ने भाषण गरेको कुरा उठाउँदै गुमेको भूमि कसरी फिर्ता गर्ने भन्ने नै भुलेको उनको भनाइ छ।
एमालेले आगामी मंसिर ४ गतेको निर्वाचनमा बहुमत प्राप्त गर्ने बताएका छन्। उनले राष्ट्र जोगाउनेलाई जिताउने वा भागबण्डामा रमाउनेलाई जिताउने त्यो जनताको हातमा रहेको बताए।
‘यो निर्वाचन देशको भविष्यसँग जोडिएको छ, राष्ट्र जोगाउनेलाई जिताउने हो या गठबन्धन गरेर भागबण्डामा रमाउनेलाई जिताउने त्यो जनताको हातमा छ’ ओलीले भने ‘एमाले मात्रै विकास गर्ने पार्टी हो, यहाँ जनताका समस्या एमालेले मात्र बुझेको छ।’
अहिलेको सरकार नीतिगत भ्रष्टचारमा लिप्त भएको उनले आरोप लगाए। अध्यक्ष ओलीले सरकारले कार्यकर्ता पाल्ने गरी बजेट र कार्यक्रम नै नभएको ठाउँमा पैसा खर्च गरिरहेको बताए।
‘प्रधानमन्त्रीको अहिले प्रचण्डसँग संगत भएकाले होला बन्दुक बाहेक अरु बोल्न छोड्नुभएछ, अध्यक्ष ओलीले भने, ‘अरू देशहरू बीचको सीमा विवाद वार्ताबाट समाधान भएका छन्। हामीले पनि वार्ता गरेर गुमेको भुमि फिर्ता गछौं।’
जनताको दुःख, सुख सोही स्थानको नेतालाई मात्र थाहा हुने बताउँदै टुरिष्ट उम्मेदवारलाई सम्मान गर्न र स्थानीय उम्मेदवारलाई जिताउन आग्रह गरे।
नेकपा एमाले बागलुङले आयोजना गरेको आमसभामा सम्बोधन गर्दै एमालेका अध्यक्ष एवं पूर्व प्रधानमन्त्री केपी शर्मा ओली। तस्बिर : अर्जुन कार्की
