बागलुङ, २३ असार । पोखरामा बिहिबारबाट सुरु भएको गण्डकी प्रदेशस्तरिय छात्र/छात्रा राष्ट्रपति रनिङ शिल्ड प्रतियोगिता–२०७८ मा बादल कार्कीले बागलुङलाई पहिलो स्वर्ण दिलाएका छन् ।
कार्कीले ८०० मिटर छात्र दौडमा २ मिनेट ०५.०९ सेकेण्डमा दौड पुरा गरी स्वर्ण जितेका हुन् । ८०० मिटर छात्र दौडमा कास्कीका प्रवेश आचार्यले २ मिनेट ०८ सेकेण्डमा दौड पुरा गरी रजत र लमजुङका विकास पोखरेलले मिनेट ०९.०१ सेकेण्डमा दौड पुरा गरी कास्य पदक प्राप्त गरेका छन् ।
बिहिबार नै भएको छात्रा तर्फ ८०० मिटर दौडमा स्याङजाकी जानकी खरालले २ मिनेट ४१.२ सेकेण्डमा दौड पुरा गरी स्वर्ण पदक हातपारिन भने, तनहुँकी विनिता सार्कीले २ मिनेट ५१ सेकेण्डमा दौड पुरा गरी रजत पदक र बागलुङकी गंगा सुनारले २ मिनेट ५६.०३ सेकेण्डमा दौड पुरा गरी काश्य पदक हात पारिन् ।
यस्तै १५०० मिटर छात्रा दौडमा पनि स्याङ्जाकी जानकी खरालले ५ मिनेट २६.४ सेकेण्डमा पुरा गर्दै स्वर्ण पदक जितेकी छिन्भने बागलुङकी पार्वती नेपालीले ५ मिनेट ४०.३ सेकेण्डमा दौड पुरा गरी रजत पदक र नवलपुरकी यमुना थापाले ५१ मिनेट ४५.५ सेकेण्डमा दौड पुरा गरी कास्य पदक जित्न सफल भएका छन् ।
छात्रतर्फको १५०० मिटर दौडमा पर्वतका कृष्ण परियारले ४ मिनेट २२.९ सेकेण्डमा दौढ पुरा गरी स्वर्ण जितेका छन् भने लमजुङका विकास पोखरेलले ४ मिनेट २९.२ सेकेण्डमा दौड पुरा गरी रजत र कास्कीका बिबेक परियारले ४ मिनेट ३२.१ सेकेण्डमा दौड पुरा गरी कास्य पदक प्राप्त गरे ।
यस्तै बिहिबार नै सम्पन्न १०० मिटर दौड छात्रतर्फ नवलपुरका तारा प्रसाद थनेतले स्वर्ण पदक जितेका छन् । आफ्ना १० प्रतिष्पर्धीलाई उछिन्दै उनले १२.२ सेकेण्डमा पुरा गरी स्वर्ण जितेका हुन् । छात्रतर्फनै १२.०३ सेकेण्डमा दौड पुरा गरेका तनहुँका प्रेम बहादुर थापाले रजत पदक हात पार्दा म्याग्दीका आशिष केसीले १२.०९ सेकेण्डमा दौड पुरा गरी कास्य पदक प्राप्त गर्न सफल भए ।
छात्रा १०० मिटर दौडमा स्याङजाकी समिक्षा गैरेले १४.६६ सेकेण्डमा दौड पुरा गरी स्वर्ण पदक हात पारेकी छन् भने नवलपुरकी प्रतिक्षा वाग्लेले १५.२१ सेकेण्डमा दौड पुरा गरी रजत र लमजुङकी लक्ष्मी परियारले १६.०० सेकेण्डमा दौड पुरा गरी कास्य पदक हात पारिन् ।
प्रतियोगितामा गण्डकी प्रदेशका १० जिल्लाका ५ सय ७४ जना खेलाडीको सहभागिता रहेको छ । उनीहरुले एथलेटिक्स, भलिबल, कब्बडी, तेक्वान्दो, कराते र उशुमा प्रतिष्पर्धा गरिरहेका छन् । प्रतियोगिता भोली शुक्रबार सम्पन्न हुनेछ ।
