१५ भदौ, काठमाडौं । भारतका पूर्वराष्ट्रपति प्रणव मुखर्जीको ८४ वर्षको उमेरमा निधन भएको छ ।
उनको दिल्लीस्थित आर्मी अस्पतालमा सोमबार साँझ निधन भएको भारतीय सञ्चार माध्यमहरुले उल्लेख गरेका छन् । पूर्वराष्ट्रपति मुखर्जीको स्वास्थ्य अवस्था आइतबारदेखि पुनः नाजुक बनेको यसअघि भारतीय सञ्चार माध्यमहरुले उल्लेख गरेका थिए । मुखर्जी कोमामा थिए । उनलाई भेन्टिलेटरको सहायता प्रदान गरिएको थियो ।
उनको फोक्सोमा संक्रमण भएको थियो । अगस्ट १० मा ब्रेन कल्टको शल्यक्रिया गर्नका लागि गरिएको परीक्षणको क्रममा मुखर्जी कोरोना भाइरसबाट संक्रमित भएको पनि पुष्टि भएको थियो । उनी सन् २०१२ देखि २०१७ सम्म भारतको राष्ट्रपति थिए । उनी सन् २००९ देखि २०१२ सम्म रक्षामन्त्री थिए । यसैगरी, सन् २००४ देखि २००६ सम्म विदेशमन्त्री भएका थिए ।
