बागलुङ, २२ फागुन । साविक विजेता बागलुङ सुधार केन्द्र र बलेवा एफसी बागलुङमा जारी तेस्रो संस्करणको जेसीज कप फुटबलको सेमिफाइनलमा प्रवेश गरेका छन् ।
बागलुङ जेसीजको आयोजनामा जारी प्रतियोगिताको पाँचौं दिन बागलुङ सुधार केन्द्रले जिल्ला प्रहरी कार्यालय बागलुङलाई र बलेवा एफसीले साविक उपविजेता श्रीमेहर गणलाई पराजित गर्दै अन्तिम चारको यात्रा तय गरेका हुन् । यससँगै सेमिफाइनल समिकरण पुरा भएको छ । प्रतियोगितामा गुरास गुठी युनाईटेड र पर्पल हेज÷एभिएम सेमिफाइनल प्रवेश गरिसकेका छन् ।
बिहिबारको पहिलो खेलमा बलेवाले श्रीमेहरलाई सडेन डेथमा ६–५ ले पाखा लगाउदै अन्तिम चारको स्थान पक्का गरेको हो ।
निर्धारित समयमा गोलरहित बराबरी सकिए संगै सडेन डेथमा बलेवा भाग्यमानी बनेको हो । निर्धारित समय दुबै टिमले बराबरी खेलेपछि खेल सिधै पेनाल्टी सुटआउटमा पुगेको थियो । पहिलो पेनाल्टीमा दुवै टिमका गोलरक्षकले १–१ गोल रोकेपछि ४–४ बराबरी भएको थियो । सडेन डेथमा बलेवाले जित निकाल्दै सेमिफाइनल प्रवेश गर्दा साविक उपविजेता विभागीय टिम श्रीमेहर गण भने प्रतियोगिताबाट बाहिरिएको छ ।
पेनाल्टीमा बलेवाको लागि विनेक खत्री, विवेक नेपाली, रोशन थापा क्षेत्री, आकाश बसेल, सुदिप माझी र सुशान्त श्रेष्ठले गोल गरेभने आयुष पौडेलको प्रहार श्रीमेहरका गोलरक्षक विप्लप गुरुङले रोकेका थिए । श्रीमेहरका मदन लिम्बु, विकास मगर, सुमन थापा, विप्लप गुरुङ र सागर कृष्ण परियारको प्रहार गोलमा परिणत हुँदा घनेन्द्र तुम्बापोको प्रहार बलेवाका गोलरक्षक कुशल नेपालीले बचाएका थिए । सडेनडेथमा श्रीमेहरका खुमबहादुर कटवालको प्रहार गोलपोष्टमा लाग्दै बाहिरियो । खेलमा बलेवाका गोलरक्षक कुशल नेपाली प्लयेर अफ दि म्याच घोषित भए ।
यस्तै बिहिबारको दोस्रो खेलमा साविक विजेता बागलुङ सुधार केन्द्रले जिल्ला प्रहरी कार्यालय बागलुङलाई २–० गोलअन्तरले पराजित गर्दै सेमिफाइनल प्रवेश गर्यो ।
पहिलो हाफ गोलरहित बराबरीमा टुंगिएको थियो । खेलको ५६ औं मिनेटमा प्रशन्न श्रेष्ठको गोलबाट सुधार केन्द्रले अग्रता लिएको थियो । सुधार केन्द्रको लागि अतिरिक्त समयको छैठौं मिनेटमा रोशन क्षेत्रीले गोल गर्दै अन्तिम चारको यात्रा निश्चित गरे ।
प्रतियोगितामा भोली शुक्रबार दुवै सेमिफाइनल खेल हुने जेसीज बागलुङका अध्यक्ष सुशान्तकृष्ण श्रेष्ठले बताए । शुक्रबार पहिलो सेमिफाइनल खेल बलेवा एफसी र गुरास गुठी युनाइटेड विच हुनेछभने दोस्रो समिफाइनल खेल पर्पल हेज÷एभिएम र बागलुङ सुधार केन्द्र विच हुनेछ ।
२४ गतेसम्म संचालन हुने प्रतियोगिताको विजेताले नगद २ लाख र उपविजेताले १ लाख रुपैयाँ सहित ट्रफी, मेडल र प्रमाणपत्र प्राप्त गर्ने जेसीज बागलुङका अध्यक्ष श्रेष्ठले बताउनुभयो । प्रतियोगिताको सेमिफाइनल पुग्ने टिमले नगद १५ हजार रुपैयाँ प्राप्त गर्नेछन्भने अनुशासित टिमले ५ हजार रुपैयाँ प्राप्त गर्नेछ । यस्तै विधागत तर्फ प्रतियोगिताको सर्वोकृष्ट खेलाडी, उत्कृष्ट फरवार्ड, उत्कृष्ट मिडफिल्डर, उत्कृष्ट डिफेन्डर, उत्कृष्ट गोलरक्षकले नगद ५–५ हजार रुपैयाँ र ट्रफी प्राप्त गर्नेछन्भने प्लेयर अफदी म्याच हुने खेलाडीले १ हजार रुपैयाँ प्राप्त गर्ने जनाइएको छ ।
