बागलुङ, २ चैत । बागलुङमा हुने ऐतिहासिक चैत्राष्टमी मेलामा हनुमान नाँच प्रदर्शन गरिने भएको छ ।
चैत्र १० गतेदेखि १४ गतेसम्म सञ्चालन हुने मेलामा बागलुङको ऐतिहासिक हनुमान नाँच पनि प्रर्दशन गरिने भएको हो ।
झण्डै तीन सय वर्ष पहिलेदेखि यहाँका नेवार समुदायले यो नाँच देखाउँदै आएको इतिहास रहेको छ ।
नेपालबाटै लोप हुन लागेको हनुमान नाँच बागलुङ आएर देख्न सकिन्छ भन्ने सन्देशका लागि नेवार समुदायसँगको समन्वयमा नाँच देखाउने तयारी गरेको कालिका भगवती गुठी व्यवस्थापन समितिका अध्यक्ष भुपेन्द्र खड्काले बताउनुभयो ।
स्थानीय कला संस्कृतिको संरक्षण र प्रवद्र्धन होस् भन्ने उद्देश्यले हनुमान नाँच देखाउने तयारी गरेको खड्काले जानकारी दिनुभयो ।
हनुमानको भेषमा सजिएका युवाहरू १० तालको सुरुमा नाच्दै हिँड्ने परम्परा यहाँका नेवार समुदायले झन्डै तीन सय वर्षदेखि बचाउँदै आएका छन् ।
नाच्नेहरू हनुमानको स्वरूपमा उत्रिन्छन् भने विभिन्न तालमा बाजा बजाउँदा अन्य व्यक्तिहरूको पनि शरीरमा कम्पन पनि हुने गर्छ ।
