९ भदौ, काठमाडौं । पर्यटन तथा नागरिक उड्डयन मन्त्रालयले विदेशमा समस्यामा परेका नेपालीको उद्धार उडान आजबाट पुनः सुचारु गरेको छ । आजदेखि भदौ १६ गतेसम्म दैनिक पाँच सय नेपालीलाई सरकारले स्वदेश फिर्ता तथा उद्धार गर्न लागेको हो ।
फ्लाई दुबई, नेपाल एयरलाइन्स, हिमालयन एयरलाइन्स, टर्किस एयरले नेपाली ल्याउन अनुमति पाएका छन् । टर्किस र कतार एयरलाइन्सले एक पटकमा एक सय जनाभन्दा बढी यात्रु ल्याउन नपाउने व्यवस्था गरिएको छ ।
यसअघि ती एयरलाइन्सले विश्व स्वास्थ्य सङ्गठनको मापदण्ड मिचेर जहाजभरि यात्रु ल्याएका थिए । उद्धार उडानका लागि यात्रुहरूले पीसीआर रिपोर्ट ल्याउनुपर्ने, पीसीआर टेस्ट गरेका र नगरेकालाई एकै ठाउँमा राख्न नपाउने, विदेशबाट आउने यात्रुले सात दिन होटल क्वारेन्टाइनमा अनिवार्य बस्नु पर्नेछ ।
पीसीआर नेगेटिभ आएमा चौध दिन होम क्वारेन्टाइनमा बस्ने लिखित प्रतिबद्धतासहित जान दिने व्यवस्था गरिएको छ । पीसीआर परीक्षण सहज भएका मुलुकबाट सरकारले अनुमति दिएका ब्यक्तिहरु मात्रै ल्याउने गरी उडानको अनुमति दिइएको छ । जसमा कुटनीतिज्ञ, विकास साझेदार, राष्ट्रसंघका कर्मचारी लगायत छन् ।
पीसीआर परीक्षण सहज नभएका मुलुकहरू साउदी अरब, कुवेत, कतारलगायत अन्य मुलुकबाट नियमित उडानबाट यात्रु ल्याउन नपाइने व्यवस्था गरिएको छ । ति मुलकुवाट नेपाली कूटनीतिक नियोगबाट सिफारिस भएको नामावली बमोजिमका यात्रुका लागि चार्टर उडान हुनेछन् ।
