काठमाडौं, २१ असोज । महिला राष्ट्रिय क्रिकेट टोलीकी कप्तान इन्दु बर्माले १ हजार रन पूरा गरेकी छिन् ।
घरेलु टोली मलेसियासँग टि ट्वान्टी आई सिरिजको चौथो खेलमा नटआउट ४८ रन बनाउँने क्रममा उनले १ हजार रन पूरा गरेकी हुन्। टि ट्वान्टी आईमा १ हजार रन पूरा गर्ने इन्दु पहिलो नेपाली महिला खेलाडी बनेकी छिन्।
यसअघिका ७६ खेलमा इन्दुले ९ सय ८५ रन बनाएकी थिइन्। मलेसियासँग १५ रन जोडेसँगै उनको १ हजार रनको आँकडा पूरा भएको हो। आफ्नो करियरमा १ हजार १८ औं बलमा चौका प्रहार गर्दै उनले १ हजार रन पूरा गरेकी थिइन्।
आजको खेलपछि इन्दुको कुल रन १ हजार ३३ रन पुगेको छ । जसमा ७७ चौका र ३ छक्का सामेल छ। उनले एक पटक अर्धशतक बनाएकी छिन्। सन् २०२१ मा कतार विरुद्ध अविजित ५५ रन जोडेकी थिइन्। टि ट्वान्टी आईमा त्यो उनको व्यक्तिगत उच्च स्कोर पनि हो।
इन्दुले आज खेल्ने क्रममा भने १ हजार रन पूरा भएको आफूलाई थाहा नरहेको बताइन् । इन्दुले अबको लक्ष्य बिस्तारै १ हजार ५ सय हुँदै २ हजार रन पुर्याउने रहेको बताइन्।
सर्वाधिक रन बनाउने दोस्रो नेपाली खेलाडी सीता राना मगर हुन्। उनले ६२ खेलमा ९ सय ६५ रन बनाएकी छिन्।
