बागलुङ, २० जेठ । दोस्रो संस्करणको आदर्श कप एसईई स्तरीय फुटवल प्रतियोगिताको उपाधि छात्रतर्फ चिल्ड्रेन लाइफ इङ्गलिस बोर्डिङ स्कुल र छात्रातर्फ आदर्श बिद्यामन्दिर माध्यमिक विद्यालयले जितेको छ ।
आदर्श स्पोर्टस क्लब बागलुङको आयोजनामा बाङ्गेचौर खेलमैदानमा मङ्गलबार भएको प्रतियोगिताको फाइनल प्रतिस्पर्धामा छात्रतर्फ डिफेन्डिङ च्याम्पियन आदर्श विद्यामन्दिर माध्यमिक विद्यालयलाई ०–१ गोलअन्तरले पराजित गर्दै चिल्ड्रेन लाइफले उपाधि जितेको हो ।
रिदिस क्षत्रीले दोस्रो हाफको चौथो मिनेटमा गरेको गोल खेलको निर्णायक बन्यो । रिदिसले फ्रिकिक मार्फत सुन्दर गोल गरेका थिए ।
छात्रतर्फको च्याम्पियन बनेको चिल्ड्रेन लाईफले रु ७५ हजार रुपियाँसहित ट्रफी, मेडल र प्रमाणपत्र पुरस्कार पायो । उपविजेता आदर्श विद्यामन्दिरले ३७ हजार पाँच सय रुपियाँसहित मेडल र प्रमाणपत्र प्राप्त ग¥यो ।
छात्रतर्फ प्रतियोगिताको सर्वोत्कृष्ट खेलाडी र सर्वाधिक गोलकर्ता आदर्श विद्यामन्दिरका सुझाव बानियाँ घोषित भएका छन् । यस्तै चिल्ड्रेन लाईफका क्यारोन पुन उत्कृष्ट गोलरक्षक, प्रतिक थापा उत्कृष्ट मिडफिल्डर, विशाल थापा उत्कृष्ट स्ट्राइकर र निशान बुढा उदयमान खेलाडी र आदर्श विद्यामन्दिरका युकेन खत्री उत्कृष्ट डिफेन्डर घोषित भए । होलिचाइल्ड बोडिङ अनुशासित टिम बनेको छ ।
यस्तै पहिलो पटक आयोजना गरिएको छात्रातर्फको खेलमा आदर्श विद्यामन्दिरले न्यू ओयसिस एकेडेमीलाई ट्राइबेकरमा २–१ गोलअन्तरले पराजित गर्दै उपाधि चुमेको छ । निर्धारित समयको खेल गोलरहित बराबरीमा सकिएपछि पेनाल्टी सुटआउटमा धकेलिएको थियो ।
पेनाल्टीमा आदर्शको लागि कट्रिना रोका र स्मृती शेरचनले गोल गरेभने जियाना दिन मियाँ, मोनिता पुन र यमन दिन मियाँ गोल गर्न असफल भए । न्यू ओयसिसको लागि आयुषा आलेले गोल गर्दा स्मारिका श्रेष्ठ, रस्मी थापा, ममता क्षेत्री र प्राप्ती अर्याल गोल गर्दा असफल भए ।
छात्रातर्फको च्याम्पियन बनेको आदर्श विद्यामन्दिरले रु ३० हजार रुपियाँसहित ट्रफी, मेडल र प्रमाणपत्र पुरस्कार पायो । उपविजेता न्यू ओयसिसले १५ हजार रुपियाँसहित मेडल र प्रमाणपत्र प्राप्त ग¥यो ।
छात्रातर्फ आदर्श विद्यामन्दिरकी यमन दिन मियाँ सर्वोत्कृष्ट खेलाडी घोषित भएकी छिन् । यस्तै आदर्शकी सन्ध्या थापा उत्कृष्ट गोलरक्षक, जियाना दिन मियाँ उत्कृष्ट मिडफिल्डर, आरजु सुवेदी उदयमान खेलाडी र न्यू ओयसिसकी आयुषा आले उत्कृष्ट डिफेन्डर र प्राप्ती अर्याल उत्कृष्ट स्ट्राइकर घोषित भए ।
छात्रातर्फ धौलागिरी आवासिय माध्यमिक विद्यालय अनुशासित टिम घोषित भयो । प्रतियोगिताभरको उत्कृष्ट प्रशिक्षक आदर्शका अनुप पाण्डे घोषित भए ।
प्रतियोगितामा छात्रतर्फ बागलुङ जिल्लाका १४ विद्यालयका १६ टिम र छात्रातर्फ ७ विद्यालयले सहभागिता जनाएका थिए ।
