बागलुङ, १० फागुन । गण्डकी प्रदेश सरकारका स्वास्थ्यमन्त्री कृष्णप्रसाद पाठकले स्वास्थ्य क्षेत्रलाई अब्बल बनाउन प्रदेश मन्त्रालय लागिपरेको बताएका छन् ।
स्वास्थ्य संस्थाको सुद्रीकरणको लागि नीतिगत कानुनी र संरचनागत सुधार आवश्यक रहेको बताउँदै मन्त्री पाठकले यसको सुधारमा मन्त्रालयले कार्यविधि बनाएर काम गरिरहेको छ । राष्ट्रिय स्वास्थ्यकर्मी महासङ्घ नेपाल जिल्ला कार्यसमिति बाग्लुङको चौथो जिल्ला अधिवेशनको उद्घाटन समारोहमा मन्त्री पाठक भनेका थिए ।
प्रदेश स्वास्थ्य मन्त्रालयले अल्पकालीन मध्यकालीन र दीर्घकालीन योजना बनाएर प्रदेशको स्वास्थ्य क्षेत्रको सुधार गर्न काम गरिरहेको मन्त्री पाठकको भनाई थियो ।
प्रदेश सरकार मातहतमा रहेका अस्पतालहरूको स्तर उन्नति गर्न योजनाबद्ध रुपमा काम गरिरहेको उनले बताए। मन्त्री पाठकले आर्थिक अनुशासन र पारदर्शितामा ध्यान दिन स्वास्थ्यकर्मीहरूलाई निर्देशन समेत दिएका थिए । आम नागरिकले महसुस गर्ने गरी स्वास्थ्य सेवा प्रदान गर्न स्वास्थ्यकर्मी प्रतिबद्ध हुनुपर्ने मन्त्री पाठकको भनाई छ ।
आम स्वास्थ्यकर्मीले साथ दिएमा प्रदेश सरकारले जनताले महसुस गर्ने गरी काम गर्ने र स्वास्थ्यकर्मीको हकहितको लागि समेत प्रदेश सरकार प्रतिबद्ध रहेको उनको भनाई थियो ।
