बागलुङ, २८ साउन ।
मास्क नलगाइ हिड्डुल गर्ने सर्वसाधारणलाई वितरण गर्नको लागि साझा चौतारी युवा सहकारी संस्था लिमिटेड बागलुङले जिल्ला प्रहरी कार्यालय बागलुङलाई मास्क सहयोग गरेको छ ।
कोरोना महामारीको विच देशमा लकडाउन खुकुलो भएपनि संक्रमणको जोखिम बढिरहेकोले सहकारीले आर्थिक अवस्था कमजोर भएर मास्क नलगाइ हिड्ने सर्वसाधरणलाई वितरण गर्नको लागि बुधबार जिल्ला प्रहरी कार्यालय बागलुङलाई ७ सय थान मास्क सहयोग गरेको हो । सहकारीका अध्यक्ष मनोज थापाले जिल्ला प्रहरी कार्यालय बागलुङका प्रमुख एसपि सारदा चौधरीलाई रु. ५ हजार रुपैयाँ बराबरको ७ सय थान मास्क हस्तान्तरण गर्नुभयो ।
सहकारीका अध्यक्ष मनोज थापाले कोरोना महामारीको अन्त्य भइनसकेकोले राज्यले व्यवस्था गरेअनुसार बाहिर हिड्डुल गर्नको लागि मास्क अनिवार्य लगाउनुपर्ने र नलगाउनेलाई कारवाही हुन थालेपछि आर्थिक अवस्था कमजोर भएकाहरुलाई समस्या भएकाले प्रहरी मार्फत मास्क वितरण गर्ने उद्देश्यले सहयोग गरिएको बताउनुभयो । उहाँले गस्तीमा हिडेको प्रहरी मार्फत मास्स नलगाइ हिड्डुल गरिरहेका सर्वसाधरणहरुलाई सम्झाएर मास्क वितरण गर्ने उद्देश्यले सहयोग गरिएको बताउनुभयो ।
उक्त अवसरमा जिल्ला प्रहरी कार्यालय बागलुङका प्रमुख एसपि सारदा चौधरीले मास्क नलगाइ हिडेका सर्वसाधारणलाई जरिवाना नगरि सहकारीले सहयोग गरेको मास्क वितरण सुरु गर्ने प्रतिबद्धता व्यक्त गर्नुभएको थियो ।
