काठमाडौँ — प्रधानमन्त्री केपी ओलीले अबको केही घण्टामा सयुक्त राष्ट्र संघको ७३ औं महासभामा सम्बोधन गर्नेछन् । त्यसपछि अाजै राति राष्ट्रसंघका महासचिव एन्टोनियो गुटेर्रेससँग पनि दुईपक्षीय भेटवार्ता गर्ने छन् ।
राष्ट्र संघको महासभामा भाग लिन आइतबार न्यूयोर्क पुगेका प्रधानमन्त्री ओलीका त्यसपछिका दिनहरु निकै व्यस्ततामा बिते। उनी शनिबार कोष्टारिका पुगेर नेपाल फर्कनेछन्।
उनले हालसम्म राष्ट्र संघकै मुख्यालयमा चार जना सरकार तथा राष्ट्रप्रमुखसँग साइडलाइनमा द्विपक्षीय भेटवार्ता गरेका छन् भने अमेरिकी राष्ट्रपति डोनाल्ड ट्रम्पले आयोजना गरेको रात्रीभोजमा पनि सहभागी भएका छन्।
‘शान्ति स्थापनार्थ कार्य’ (एक्सन फर पिसकिपिङ) को उच्चस्तरीय बैठक र एशिया सोसाइटीको कार्यक्रममा सम्बोधन गरे। त्यसैगरी उनले भारतीय परराष्ट्रमन्त्री सुष्मा स्वराजसँग पनि भेटवार्ता गरेका छन्।
प्रधानमन्त्री ओलीले राष्ट्र संघको मुख्यालयमा बुधबार राति बेलायती प्रधानमन्त्री थेरेसा मेसँग भेटवार्ता गरे। भेटवार्ताका क्रममा व्यापार, लगानी तथा पर्यटनसहितका बहुक्षेत्रमा सहयोग बलियो बनाउने विषयमा छलफल भएको बताइएको छ।
धानमन्त्री ओलीले क्यानडाका समकक्षी जस्टिन टुडोसँग पनि भेटवार्ता गरेका छन्। भेटवार्ताका क्रममा दुई नेताबीच दुईपक्षीय परामर्श संयन्त्र स्थापना गर्नेबारे समझदारीपत्रमा हस्ताक्षरसमेत भएको छ।
प्रधानमन्त्री ओलीले दुई मुलुकबीच सन् १९६५ मा कूटनीतिक सम्बन्ध स्थापना भएपछि उच्चस्तरमा भेटवार्ता भएकोमा खुशी व्यक्त गर्दै नेपाल र नेपालीलाई क्यानडा सरकार रक्यानडाका जनताका तर्फबाट प्राप्त सहयोग तथा भूकम्पपछिका समयमा भएका सहयोगका लागि धन्यवाद दिएका थिए।
