बागलुङ, १८ असार । बागलुङमा ‘दिगो विकासका लागि सहकारी’ भन्ने मूल नारा सहित शनिबार १०१ औं अन्तर्राष्ट्रिय सहकारी दिवस मनाईएको छ । दिवसको अवसरमा जिल्ला सहकारी संघ लिमिटेड बागलुङले धौलागिरी अस्पतालका बिरामीलाई फलफूल वितरण गरेको छ ।
सहकारीको सिद्धान्तमध्य समुदाय प्रति चासो अन्र्तगत जिल्ला सहकारी संघ लिमिटेड बागलुङले नीतिगत व्यवस्था मार्फत समुदायको दिगो विकासमा टेवा पु¥याउनु पर्छ र आफ्ना प्रत्येक निर्णय एवं योजनाले समुदायमा पार्ने प्रभाव बिचार गरी सकारात्मक योगदानका लागि फलफूल वितरण कार्यक्रम आयोजना गरेको संघले जनाएको छ ।
कार्यक्रममा जिल्ला सहकारी संघ लिमिटेड बागलुङका सञ्चालक तथा काठेखोला गाँउपालिकावडा नं. ६ का वडाअध्यक्ष वृहस्पती कंडेल, धौलागिरी अस्पतालका वरिष्ठ अस्पताल नर्सिङ निरिक्षक देवी भट्टराई, राष्ट्रिय सहकारी बैंक बागलुङ शाखाका प्रबन्धक युवराज त्रिपाठी लगायतले मन्तव्य व्यक्त गर्नुभएको थियो ।
जिल्ला सहकारी संघ लिमिटेड बागलुङले धौलागिरी अस्पतालमा उपचाररत ७० जना बिरामीलाई फलफूल वितरण गरेको संघका प्रबन्धक सिर्जना शर्माले जानकारी दिनुभयोे । जिल्ला सहकारी संघ लिमिटेड बागलुङले हरेक अन्तर्राष्ट्रिय सहकारी दिवसको अवसरमा विभिन्न सामाजिक संघसंस्थामा सहयोग गर्दै मनाउने गर्दछ ।
कार्यक्रम जिल्ला सहकारी संघ लिमिटेड बागलुङका अध्यक्ष हुमाकुमारी जि.सी (अञ्जु) को अध्यक्षता, संघको सञ्चालक खिम बहादुर कार्कीको स्वागत तथा सचिव तेज प्रसाद शर्माको सञ्चालनमा सम्पन्न भएको थियो ।
अन्तर्राष्ट्रिय सहकारी महासंघ (आईसीए) को अगुवाइमा जुलाई महिनाको पहिलो शनिबार विश्वभर सहकारी दिवस मनाईन्छ ।
