बागलुङ, ७ चैत । भोलि (बुधबार)देखि सुरु हुन लागेको प्रधानमन्त्री कप त्रिदेशीय फुटबल प्रतियोगिताका लागि मंगलबार नेपाली राष्ट्रिय फुटबल टोलीको घोषणा भएको छ । औपचारिक नियुक्तिको प्रक्रिया पूरा हुन बाँकी प्रमुख प्रशिक्षक भिन्सेन्जो अल्बर्टो एनेसले २३ सदस्यीय टिमको घोषणा गरेको अखिल नेपाल फुटबल संघ एन्फाले जानकारी दिएको छ ।
नेपाल, भुटान र लाओस सम्मिलित प्रधानमन्त्री कप त्रिदेशीय शृंखलामा नेपालले पहिलो खेल भोलि बुधबार लाओससँग र १४ चैतमा भुटानसँग खेल्नेछ । तीन टोलीले एकअर्कासँग खेलेपछि अंकका आधारमा दुई टिमले फाइनल खेल्नेछन् । फिफा विण्डो पारेर दुई टोलीलाई आमन्त्रण गरी एन्फाले प्रतियोगिता आयोजना गरेको हो ।
नेपाली टिममा सातजना नयाँ अनुहार छन् । राष्ट्रिय टिमका नियमित खेलाडीहरु विदेश पलायन भएपछि नेपाल टिमको सन्तुलन नै विग्रेको छ । नयाँ प्रशिक्षकले ए डिभिजन लिगमा पाँच चरणको प्रदर्शनका आधारमा नयाँ खेलाडी पहिचान गरेका हुन् ।
गोलकिपर अभिशेक बराल, डिफेण्डरहरु सनिस श्रेष्ठ र पदम भट्टराई, मिडफिल्डहरु मणिकुमार लामा र नवीन लामा तथा फरर्वार्डहरु सुमित श्रेष्ठ र दीपकसिंह ठकुरी पहिलोपल्ट टिममा परेका हुन् ।
मनाङ मर्स्याङदीबाट लिग खेलिरहेका सुमित र एपीएफबाट लिग खेलिरहेका मणि गत वर्ष ए डिभिजन फुटसल लिगमा क्रमसः विजेता र उपविजेता टिमका प्रमुख खेलाडीसमेत थिए ।
नेपाली टिमको मिडफिल्डरमा बागलुङका कमल थापा समावेश भएका छन् । मनाङ मर्स्याङदीबाट लिग खेलिरहेका कमल नेपाली टिममा दोस्रो पटक समावेश भएका हुन् । कमल पहिलो पटक अब्दुल्लाह अल्मुतारीको रोजाइमा पर्दै विश्वकप छनोटको खेलमा टिममा समावेश भइ अष्ट्रेलिया विरुद्धको खेलमा डेब्यू गरेका थिए ।
बागलुङ नगरपालिका–१० भकुण्डेकाका कमल राष्ट्रिय टिमको सिनियर टोलीबाट खेल्ने बागलुङका पहिलो खेलाडी हुन् ।
नेपाली टिम
गोलरक्षक ः किरण कुमार लिम्बु, दीप कार्की र अभिशेक बराल
डिफेण्डर ः सनिस श्रेष्ठ, विकास खवास, अनन्त तामाङ, पदम भट्टराई, आदित्य चौधरी र निशान्त खड्का ।
मिडफिल्डर ः पुजन उपर्कोटी, एरिक विष्ट, नवीन लामा, रोहित चन्द, कमल थापा, मणिकुमार लामा र भरत खवास ।
फरवार्ड ः आयुश घलान, नवयुग श्रेष्ठ, दीपकसिंह ठकुरी, अन्जन विष्ट, आशिष चौधरी, सुमित श्रेष्ठ र मनिष डाँगी ।
