काठमाडौं, १८ फागुन। आईसीसी यू-१९ विश्वकप एसिया छनोटको अन्तिम खेलमा आज नेपालले घरेलु टोली यूएईसँग निर्णायक खेल खेल्दैछ ।
६ राष्ट्र सम्मिलित प्रतियोगितामा शीर्ष टोली अर्को वर्ष श्रीलंकामा आयोजना हुने यू-१९ विश्वकपमा छनोट हुनेछ । त्यसैले दुवै टोली जितसहित विश्वकपमा पुग्ने लक्ष्यमा रहेका छन् ।
सन् २०१६ पछि कुनै पनि विश्वकप नखेलेको यू-१९ नेपाली युवा टोली यसपटक जसरी पनि छनोट हुने लक्ष्यसहित यूएई पुगेको थियो । यसअघि राउण्ड रोविनका चारवटै खेल जित्दै आत्मविश्वासी बनेको नेपाली यू-१९ टोली अन्तिम खेल जित्दै ८ वर्षपछि यू-१९ विश्वकपमा छनोट हुने लक्ष्यमा छ ।
नेपालले यसअघि सिंगापुरलाई ९६ रनले, कुवेतलाई २४३ रनले, हङकङलाई ९ विकेटले तथा मलेसियालाई १० विकेट हराइसकेको छ । लिगको खेल भएपनि यूएईविरुद्धको खेल फाइनल जस्तै हुनेछ । जित्ने टिम यू-१९ विश्वकपमा पुग्नेछ भने हार्ने टिमको विश्वकप खेल्ने सम्भावना सकिनेछ ।
नेपाल यू-१९ टिमले सन् २०१६ मा पछिल्लो पटक बंगलादेशमा यू-१९ विश्वकप खेलेपछि उमेर समूहको टिमले फेरि विश्वकप खेल्न सकेको छैन । पछिल्लो तीन संस्करणमा नेपाल छनोट हुनै सकेन ।
सन् २०१८ मा अफगानिस्तान र पछिल्ला दुई संस्करणमा भने नेपालका लागि यूएई नै बाधक बनेको थियो ।
२०२० को विश्वकप छनोटमा नेपाल यूएईसँग वर्षाले प्रभावित खेलमा १ रनले पराजित भएको थियो र त्यही १ रनको हार नै नेपालको लागि विश्वकपको ढोका बन्द गर्न निर्णायक बन्यो । गत वर्ष यू-१९ विश्वकप हुँदा कोभिड १९ को कारण एसिया लगायत केही क्षेत्रको छनोट प्रतियोगिता हुन सकेन ।
त्यसकारण आजको खेल दुवै टिमका लागि एकदमै महत्त्वपूर्ण हुनेछ ।
