काठमाण्डौं, २ पुस । सन् २०२२ को विश्वकप फुटबलमा अन्तिम दुई खेल बाँकी रहदा तेस्रो स्थानको लागि आज राति क्रोएसिया र मोरक्को भिड्दै छन् भने उपाधिका लागि भोलि अर्जेन्टिना र फ्रान्स भिड्दैछन्।
सबैको चासो अर्जेन्टिना र फ्रान्सबीचको फाइनल खेलमा रहेको छ । अझ विशेषगरी अर्जेन्टिनी कप्तान लियोनल मेस्सीलाई लिएर रहेको छ । के उनी आफ्नो अन्तिम विश्वकपमा विजेता बन्न सक्लान ? लगातार तीन वटा फाइनल हारेका मेस्सीले लगातार तीन वटा उपाधि जित्न सक्लान ? पेले र म्याराडोना जस्तै सर्वकालीन् महान् खेलाडी बन्न सक्लान् उनी? यो अहिले धेरैको चासोको विषय हो।
यस्तै २३ वर्षकै उमेरमा लगातार दुई वटा विश्वकप जितेर के एम्बाप्पेले आफूलाई महान् खेलाडीको सूचीमा उभ्याउन सक्लान ? यो पनि अहिले सर्वाधिक चर्चा तथा चासोको विषय रहेको छ ।
विश्वकपको फाइनल भिडन्तलाई लिएर अहिले विभिन्न अड्कलबाजीहरू भइरहेको छ। भविष्यवाणी गर्न कुकुर, बिरालो, कछुवा, चिल, माछालगायत विभिन्न प्राणीको सहायता लिइएको छ।
अधिकांशले विश्वकप अर्जेन्टिनाले जित्ने पूर्वानुमान गरेका छन्। आजभोलि टिकटकमा यस्ता भिडियो प्रशस्तै देखिन्छ। तर किन होला? के जनावरले विश्वकपको विजेताको भविष्यवाणी गर्न सक्छ? यो सबैको सुरुआत सन् २०१० को विश्वकपबाट भएको हो। त्यसबेलाको ‘पल द अक्टुपस’ले यो ट्रेन्डको सुरु गराएको थियो।
दक्षिण अफ्रिकामा भएको उक्त विश्वकप फुटबलको आठ वटा खेलमा उक्त अक्टुपसले भविष्यवाणी गरेको थियो। त्यसमध्ये आठ वटै खेलको विजेता अक्टुपसले चुनेको टोली भएको थियो। सबैभन्दा रोचक त, नेदरल्याण्ड्सलाई हराउँदै फाइनल खेल स्पेनले जित्छ भनेर पनि उक्त अक्टुपसले भविष्यवाणी गरेको थियो।
यो घटनापछि उक्त अक्टुपस संसारभर चर्चित भएको थियो। त्यसैको सिको गर्दै त्यसयताको हरेक विश्वकपमा जनावरलाई विजेता पूर्वानुमान गर्न लगाए पनि कुनैले पनि पलको स्थान लिन सकेको छैन।
