बागलुङ, २५ मंसिर । झोलुङ्गे पुलको जिल्लाको रुपमा ख्याति कमाएको बागलुङमा फेरि एउटा लामो र अग्लो झोलुङ्गे पुल थपिएको छ ।
बागलुङ नगरपालिका–४ कुँडुले फाँटदेखि म्याग्दीको बेनी नररपालिका–१ रत्नेचौर जोड्ने ढोडेनी खोलामाथिमा ३८८ मिटर लामो र १७० मिटर अग्लो पुल निर्माण गरिएको हो । यस अघि बागलुङ र पर्वत जोड्ने गरी कालीगण्डकी नदीमाथि नेपालकै लामो र अग्लो झोलुङ्गे पुल गण्डकी गोल्डेन ब्रिज निर्माण गरिएको थियो ।
ढोडेनी खोलामा पुल निर्माण भए पछि एक घण्टाको पैदल यात्रा पाँच मिनेटमा सिमित भएको छ । बर्खामा खोला तर्न र घुमाउरोबाटो धेरै समय खर्च गरेर हिँडन्पर्ने समस्याको अन्त्य भएको बागलुङ नगरपालिका–४ का वडाध्यक्ष कुमार विक्रम क्षेत्रीले बताउनुभयो ।
अहिले पुल अवलोकनका लागि पुग्नेको संख्यामा उल्लेख्यरुपमा वृद्धि भएको छ । पुल निर्माण सम्पन्न भए पनि हस्तान्तरणको मात्रै काम बाँकी रहेको पुल निर्माणको जिम्मा पाएको थानी हिमशिखर जेभी निर्माण कम्पनीका आधिकारीक प्रतिनिधि नरहरी खड्काले जानकारी दिनुभयो । संघीय सरकारको ‘सस्पेन्सन ब्रिज’ डिभिजन काठमाण्डौले म्याग्दीको बेनी नगरपालिका–१ रत्नेचौरदेखि बागलुङ नगरपालिका–४ कुडुले जोड्ने ढोडेनी खोलामाथि पुल निर्माण गत बर्षको असोजमा शिलान्यास गरिएको थियो ।
उक्त पुल निर्माणमा तीन करोड ५० लाख रुपियाँ खर्च भएको छ । सम्झौता मितिको करिब चार महिना ढिला गरी पुल निर्माण सम्पन्न भएको हो । गएको असार मसान्तभित्र काम सक्ने गरी गत वर्षको असोजमा पुल शिलान्यास गरिएको थियो । पुल निर्माणको लागि बागलुङ तर्फ कुँडुले निवासी जयलाल सापकोटा, इन्द्र शर्मा र पशुपति सापकोटा लगायतले करिब डेढ रोपनी जग्गा उपलब्ध गराउनुभएको थियो ।
म्याग्दी जिल्लाको रत्नेचौर, ज्यामरुककोट आसपासका क्षेत्रका बासिन्दाले सदरमुकाम बेनी बजारमा भन्दा बागलुङ बजारमा आर्थिक कारोबार र व्यापार व्यवसाय लगायतका गतिविधि गर्ने भएकाले पुलले आवतजावतमा सहजता थपेको छ ।
पुल निर्माणसंगै धार्मिक गन्तव्यको रुपमा विकास भइरहेको बागलुङको पञ्चकोट, कुँडुलेमा रहेको सालग्राम संग्रहालय अवलोकन गर्न आउनेको संख्यामा वृद्धि हुने अपेक्षा गरिएको छ ।
