बागलुङ, ४ मङ्सिर । प्रतिनिधिसभा र प्रदेशसभा निर्वाचनमा बागलुङमा ५३ दशमलव ५६ प्रतिशत मतदान भएको छ। यहाँ दुई प्रतिनिधिसभा सदस्य र चार प्रदेशसभा निर्वाचन क्षेत्र छ।
एक लाख ९२ हजार २२७ मतदातामध्ये एक लाख २ हजार ९६३ मतदाताले मतदान गरेको जिल्ला निर्वाचन कार्यालय बागलुङका प्रमुख यज्ञ रिजालले जानकारी दिए। जिल्लाभरी शान्तिपूर्ण रूपमा चुनाव सम्पन्न भएको मुख्य निर्वाचन अधिकृत डा. दिवाकर भट्टले बताए।
मुख्य निर्वाचन अधिकृत भट्टले मतदानस्थलबाट मतपेटिकाहरू मतगणनास्थलमा ल्याउने कार्य भइरहेको बताए। उनले सर्वदलीय बैठक बसेपछि दुवै स्थानमा मतगणना सुरु हुने जानकारी दिए। उनले भोलि (सोमबार) बिहानदेखि मतगणना हुन सक्ने जानकारी दिए।
बागलुङमा दुई प्रतिनिधिसभा सदस्यका र चार प्रदेशसभा सदस्यका लागि ३१ जना उम्मेदवार चुनावी मैदानमा छन्।
