काठमाण्डौं, २ मंसिर । घरेलु टोली नेपालले तेस्रो तथा अन्तिम एक दिवसीय अन्तर्राष्ट्रिय क्रिकेटमा आज शुक्रबार युएईसँग प्रतिस्पर्धा गर्दैछ । टियु अन्तर्राष्ट्रिय मैदान किर्तिपुरमा नेपालले टस जितेर युएईलाई ब्याटिंगको निम्तो दिएको छ । खेल बिहान ९ बजे सुरु हुनेछ ।
खेलमा नेपालले फास्ट बलर करन केसीलाई बाहिर राख्दै टप अर्डर देब्रे ब्याट्सम्यान तथा अफ स्पिनर हरि शंकर शाहलाई मौका दिएको छ ।
नेपालको अन्तिम एघार ः रोहित पौडेल ( कप्तान ) , ज्ञानेन्द्र मल्ल, आरिफ शेख, दिपेन्द्र ऐरी, आसिफ शेख ( विकेटकिपर) , सोमपाल कामि, अर्जुन साउद, गुल्सन झा, हरि शंकर शाह, कुशल भुर्तेल, ललित राजबंशी रहेका छन ।
नेपाल र युएईबीचको यस खेल सिरिजको निर्णायक खेलको रूपमा रहेको छ । किनकि तीन खेलको सिरिज १।१ को बराबरीमा रहेको छ । सिरिजको पहिलो खेलमा युएई ८४ रनले विजयी भएको थियो । तर, दोस्रो खेलमा नेपालले ३ विकेटको जित हासिल गरेको थियो ।
यस्तोमा अन्तिम खेलमा दुवै टोली जित निकाल्दै सिरिज आफ्नो बनाउने योजनामा रहेका छन । नेपाल आजको खेल जित्दै सिरिज २।१ ले जितेर इतिहास कायम गर्न चाहन्छ । नेपालले यस सिरिज जितेमा घरेलु भूमिमा नेपालले पहिलो पटक दुई देशीय सिरिज जित्ने छ ।
पपुवा न्यू गिनीसँग नेपालले यसै वर्ष पहिलो एक दिवसीय सिरिज घरेलु भूमिमा खेलेको थियो । दुई खेलको उक्त सिरिज नेपालले २।० ले हारेको थियो ।
यूएई पनि नेपाललाई घरेलु मैदानमा पराजित गरी सिरिज जित्न चाहन्छ । २०१९ मा नेपालले युएईलाई उसकै घरेलु भूमिमा पराजित गरी तीन खेलको सिरिज २।१ ले जितेको थियो ।
नेपाल र युएईबीचको यस खेल नवौँ खेल हो । हालसम्म खेलिएको ८ खेलमा युएईले ५ पटक जितेको छ भने नेपालले तीन पटक आफ्नो बनाएको छ ।
