काठमाण्डाै, २७ कात्तिक । आईसीसी टी–२० विश्व कप क्रिकेटको उपाधिका लागि आज इङ्ल्यान्ड र पाकिस्तान खेल्दैछन् । फाइनल खेल अस्ट्रेलियाको मेलबर्न मैदानमा नेपाली समय अनुसार दिउँसो पौने दुई बजे सुरु हुनेछ ।
इङ्ल्यान्ड र पाकिस्तान तेस्रो पटक फाइनलमा पुगेका हुन् । यो संस्करणको विजेताले दोस्रो पटक उपाधि जितेर वेस्ट इन्डिजसँगको रेकर्ड बराबरी गर्नेछ । यसअघि सन् २०१० मा इंग्ल्याण्डले टी-२० विश्वकपको उपाधि जितेको थियो भने पाकिस्तानले सन् २००९ को विश्वकप उपाधि जितेको थियो।
दुवै टोली आ–आफ्नो समूहको उपविजेताको हैसयतमा सेमिफाइनल पुगेका थिए। यस्तोमा आइतबारको फाइनल खेलमा यी दुई टोलीबीच रोचक प्रतिस्पर्धा हुन सक्ने अनुमान छ।
पाकिस्तानले सेमिफाइनलमा न्युजिल्यान्डलाई हराएको थियो भने इङ्ल्यान्डले भारतलाई १० विकेटले हराएको थियो । लगातार दुई खेलमा पराजित पाकिस्तान सुपर–१२ को समूह ‘२’ मा दक्षिण अफ्रिका, नेदरल्यान्ड्ससँग पराजित हुँदा उपविजेताका रुपमा सेमिफाइनलमा पुग्न सफल भयो ।
पाकिस्तान सन् २००९ को टी–२० विश्व कप च्याम्पियन र इङ्ल्यान्ड सन् २०१० को च्याम्पियन टोली हो । पछिल्लो समय पाकिस्तान र इङ्ल्यान्डबीच सात वटा अन्तर्राष्ट्रिय टी–२० खेल भएकोमा इङ्ल्यान्डले ४ र पाकिस्तानले ३ वटा जितेको छ ।
मेलवर्न क्रिकेट मैदानमा वर्षा हुने सम्भावना ९५ प्रतिशत रहेको मौसदविदले बताएका छन्। यस्तोमा पहिलो प्राथमिकता आइतबार नै खेल छोट्याएर नतिजा निकाल्नु हुनेछ। यदि आइतबार खेल सुरु भयो तर पूरा हुन सकेन भने सोही अवस्थाबाट सोमबार खेल सुरु हुनेछ। सोमबार पनि पानी पर्ने सम्भावना समान छ। यसरी दुवै दिन पानीले खेल रोकिएको खण्डमा पाकिस्तान र इंग्ल्याण्ड संयुक्त विजेता बन्नेछन्।
यसअघि सन् २०१९ को विश्वकपमा भारत र न्युजिल्याण्डबीचको सेमिफाइनल खेल पनि दुई दिन लगाएर पूरा गरिएको थियो।
