बागलुङ, २३ कार्तिक । बागलुङमा निर्वाचन बहिस्कारको पोष्टर टाँस्दै हिडेका नेकपा बहुमतका तीन जना नेता पक्राउ परेका छन् ।
धमेन्द्र बास्तोला नेतृत्वको नेकपा बहुमतका नेता गलकोट नगरपालिका–१ का ४५ बर्षिय दलसिंह खत्री, ३५ बर्षिय हरि नेपाली र ४५ बर्षिय कृष्ण बहादुर कुँवरलाई जिल्ला प्रहरी कार्यालय बागलुङले पक्राउ गरेको हो । उनीहरु नेकपा बहुमतमा आवद्ध रहेको तर पद नखुलेको जिल्ला प्रहरी कार्यालय बागलुङका सूचना अधिकारी प्रहरी नायव उपरीक्षक गंगा बहादुर थापाले बताए ।
आगामी मंसिर ४ गते हुने प्रतिनिधिसभा तथा प्रदेशसभा निर्वाचन बहिस्कारको पोष्टार टाँस्दै हिडेका बागलुङ नगरपालिका–२ ट्राफिक चोकदेखि मंगलबार साँझ पक्राउ गरिएको जिल्ला प्रहरी कार्यालय बागलुङका प्रनाउ थापाले बताए । उनले उनीहरुको साथबाट संघिय निर्वाचन बहिस्कार गरौं देखिएका पोष्टर र पर्चा बरामत गरिएको बताए । ‘निर्वाचन आचारसंहिता विपरीत निर्वाचन बहिस्कारको पोष्टर टाँस गरेका कारण पक्राउ गरिएको हो,’ प्रनाउ थापाले भने,‘उनीहरुको थप अनुसन्धान भइरहेको छ । अनुसन्धानपछि कारवाहीको प्रक्रिया अगाडी बढाउछौं ।’
विप्लव नेतृत्वको नेकपा, विप्लवबाट विभाजित धर्मेन्द्र बाँस्तोलाको नेकपा बहुमत, आहुती र मोहन वैद्यको कम्युनिष्ट पार्टी र नेकपा (मशाल)ले पनि निर्वाचन बहिष्कारको निर्णयसहित आन्दोलनका कार्यक्रम घोषणा गरेका छन् ।
