लन्डन- भारतले इङ्ल्यान्डसँगको एकदिवशीय अन्तर्राष्ट्रिय शृंखलामा सोमबार १० विकेटको जित हात पार्दै तीन खेलको शृंखलामा १-० को अग्रता लिएको छ ।
पहिला ब्याटिङ गरेको इङ्ल्यान्ड २५ ओभर २ बलमा एक सय १० रनमा अलआउट भएको थियो । घरेलु टोलीलाई सस्तोमा समेट्न भारतका जसप्रित बुमराहले ६ विकेट लिए । बुमराहले ७ ओभर २ बलमा केवल १९ रन खर्चिएका थिए । सामीले ७ ओभरमा ३१ रन खर्चिएर ३ विकेट लिए ।
इङ्ल्यान्डका सुरुका ६ मध्ये चार जना ब्याट्सम्यानले खाता खोल्न नसकेपनि कप्तान तथा विकेटकिपर जोस बटलर एक्लैले ३० रन बनाए । डेभिड विलीले २१ र मोइन अलीले १४ र ब्रेडन कार्सले १५ रन बनाए । भारतले १८ ओभर ४ बलमा विकेट नगुमाई लक्ष्य पुरा गर्यो । भारतका रोहित शर्मा ७६ र शिखर धवन ३१ रनमा अविजित रहे ।
