बागलुङ, १ चैत । बागलुङमा जारी जिल्ला लिग फुटबल प्रतियोगितामा बाल जीवन खेलकुद क्लबले लगातार दोस्रो र बागलुङ कालिका युवा क्लबले पहिलो जित निकालेका छन् ।
मंगलबार भएको समुह ‘ख’को पहिलो खेलमा बाल जीवन खेलकुद क्लबले विर गोर्खाली युवा क्लबलाई ३–१ गोल अन्तरले पराजित गर्दै लगातार दोस्रो जित निकालेको हो । बाल जीवनको लागि मोहन थापाले २ र अजय पुनले १ गोल गरेका थिएभने विर गोर्खालीको लागि एक मात्र गोल शेखर क्षेत्रीले गरेका थिए ।
बाल जीनको लागि मोहन थापाले खेलको ३१ औं र ८४ औं मिनेटमा गरेका थिएभने अजय पुनले खेलको ३३ औं मिनेटमा गोल गरेका थिए । विर गोर्खालीको लागि शेखर क्षेत्रीले ८२ औं मिनेटमा गरेका थिए ।
लगातार दोस्रो जित निकालेको बाल जीवनले दुई खेलमा ६ अंकका साथ समुह ‘ख’को शिर्ष स्थानमा रहेको छभने पराजित भएको विर गोर्खाली एक जित र एक हार सहित ३ अंकका साथ समुहको दोस्रो स्थानमा रहेको छ ।
यस्तै आजै भएको समुह ‘ख’को दोस्रो खेलमा बागलुङ कालिका युवा क्लबले रुद्रेपिपल युवा क्लबलाई ३–१ गोलअन्तरले पराजित गरेको छ । बागलुङ कालिकाले उपहार गोलबाट खाता खोलेको थियो । खेलको २६ औं मिनेटमा रुद्रेपिपलका विजय कार्कीले आत्मघाति गोल गरेका थिए । बागलुङ कालिकाको लागि खेलको ३७ औं मिनेटमा देवेन्द्र केसीले र ४७ औं मिनेटमा निरज थापाले गोल गरेका थिए ।
रुद्रेपिपलको लागि खेलको ६८ औं मिनेटमा ऋषि बजगाइले गोल गरेका थिए । खेलको ६८ औं मिनेटमा प्राप्त गरेको पेनाल्टीमा कविन पुनको प्रहार रोकिएपछि ऋषिले गोलमा परिणत गरेका थिए ।
प्रतियोगितमा पहिलो जित हात पारेको बागलुङ कालिकाले दुई खेलमा ३ अंकका साथ समुह ‘ख’को तेस्रो स्थानमा रहेको छभने दोस्रो हार व्यहोरेको रुद्रेपिपल समुहको अन्तिममा रहेको छ ।
प्रतियोगिता अन्तरगत बुधबार समूह ‘क’का लिगका अन्तिम खेल हुनेछन् । बुधबार समूह ‘क’को पहिलो रामरेखा युवा क्लब र पावर फिटनेस क्लबका विच हुनेछभने दोस्रो खेल गुठी युनाइटेड क्लब र कालिका भगवती युवा क्लब विच हुने संघका महासचिव जय राजभण्डारीले बताउनुभयो । बुधबारको दोस्रो खेलको विजेता टिम फाइनलमा प्रवेश गर्नेछ । फाइनल प्रवेशको लागि गुठी युनाइटेडलाई जित्नै पर्ने दबाब रहेको छभने कालिका भगवती युवा क्लबलाई बराबरीले पनि पुग्नेछ ।
जिल्ला फुटबल संघ बागलुङले आयोजना गरेको लिगमा ८ टोलीको सहभागिता रहेको छ । सहभागी ८ टोलीलाई दुई समुहमा विभाजन गरि लिग संचालन गरिएको छ । राउन्ड रोविन लिगपछि दुई समूहका शीर्ष टोलीबीच फाइनल हुनेछ । जिल्ला फुटबल संघले लिगको लागि नयाँ ७ टोलीबीच छनोट प्रतियोगिता सञ्चालन गरेको थियो । त्यसबाट शीर्ष ३ टोली लिगमा छनोट हुन सफल भएका थिए ।
लिग विजेता टोलीले ५५ हजार ५ सय ५५ रुपैयाँ र दोस्रो टोलीले ३३ हजार ३ सय ३३ रुपैयाँ प्राप्त गर्नेछ । सर्वोत्कृष्ट खेलाडी सहित विधागत उत्कृष्ट खेलाडी पनि पुरस्कृत हुने बताइएको छ ।
