१८ भदौ, बागलुङ । बागलुङको ढोरपाटन नगरपालिकामा गएराति पहिरो जाँदा बेपत्ता भएकामध्ये चार जनाको शब फेला परेको छ ।
बुधबार राती १२ बजे भूँजिखोलामा आएको बाढीले ढोरपाटन नगरपालिका वडा नम्बर ८ र ९ बोबाङका १७ जना सम्पर्क विहिन भएका थिए । त्यसमध्य ४ जनाको शब भेटिएको र १३ जनाको परिचय खुलेको इलाका प्रहरी कार्यालय बुर्तिबाङका प्रमुख प्रहरी निरीक्षक प्रकाशसिंह भण्डारीले जानकारी दिए ।
प्रहरी निरीक्षक भण्डारीका अनुसार बेपत्ता भएकामध्ये ढोरपाटन नगरपालिका–३ भुजिखोला किनारमा अन्दाजी ३०÷३२ वर्षको पुरुषको शव फेला परेको छभने ढोरपाटनकै वडा नं ५ बुडाथोकस्थित पुलको लठ्ठोमा अड्केको अवस्थामा अन्दाजी ३०÷३५ वर्षका पुरूषको शव भेटिएको उनले बताए ।
त्यस्तै बडिगार्ड गाउँपालिका–५ बालुवामा अन्दाजी २०/२२ वर्षका पुरूष र बडिगाड–७ खोप्चेमा अन्दाजी १२/१३ का पुरूषको शव फेला परेको भण्डारी बताए । उनले शवको सनाखत हुन नसकेको जानकारी दिए ।
प्रहरी निरीक्षक भण्डारीले बेपत्ता मध्य १३ जनाको परिचय खुलेको बताए । उनले ढोरपाटन नगरपालिका–९ का ३५ वर्षीया कौशला पुन, उनका छोरा ६ वर्षीय हिक्मत, सोही ठाउँ बस्ने ३५ वर्षीया जीतबहादुर घर्ती, ४० वर्षीया राजु घर्ती, ३० वर्षीया कुमारी बिक, १९ वर्षीया पुतली बिक र ३२ वर्षीया करमती घर्तीमगर रहेका बताए ।
त्यस्तै सोही ठाउँकै ३५ वर्षीया रीना घर्तीमगर, ३५ वर्षीया दिलमाया घर्तीमगर, उनको छोरा नाम नखुलेको ६ वर्षीया बालक, ५५ वर्षीया डोटी पुन, ५२ वर्षीया टुलमती पुन र गलकोट नगरपालिका ४ घर भई ढोरपाटन घुम्न गएका २५ वर्षीय नविन भण्डारी बेपत्ता भएको भण्डारीले जानकारी दिए ।
उद्धारको लागि घटनास्थलमा इलाका कार्यालय बुर्तिबाङको टोली पुगिसकेको र बेपत्ताहरुको खोजी सुरु गरेको भण्डारीले बताए । बागलुङ बजारदेखि हिडेको प्रमुख जिल्ला अधिकारी सुरेश न्यौपाने सहित नेपाली सेना र सशस्त्र प्रहरीको उद्धार टोली घटनास्थल पुग्दै छ ।
