बागलुङ, २ माघ । बागलुङमा जारी दोस्रो स्मृति कप फुटबल प्रतियोगितामा जिल्ला प्रहरी कार्यालय बागलुङ र संकल्प पुर्नस्थापना केन्द्र सेमिफाइनलमा प्रवेश गरेका छन् ।
बुधबार जिल्ला प्रहरी कार्यालय बागलुङले नेपाली सेनाको श्रीमेहर गणलाई ३–१ र संकल्पले नेपाली सेनाकै नारायण दल गण मुस्ताङलाई ट्राइबेकरमा पराजित गर्दै सेमिफाइनलको यात्रा तय गरेका हुन् ।
राष्ट्रिय खेलाडीसहित मैदान उत्रिएको प्रहरीको लागि खेलको ५ औं मिनेटमा केशर बलामले गोल गर्दै अग्रता दिलाएका थिए । पुलिसको लागि खेलको १२ औं मिनेटमा विवेक गुरुङले गोल गर्दै अग्रता दोब्बर बनाए ।
श्रीमेहरको लागि प्रकाश बानियाँले खेलको १७ औं मिनेटमा गोल गर्दै अग्रतालाई कम गराएका थिए । खेलको इन्जुरी समयमा प्रहरीका मनबहादुर विष्टले गोल गर्दै पुलिसको जित निश्चित गरेका थिए । पुलिसले राष्ट्रिय फुटबल टिमका सदस्य रन्दिप पौडेललाई मैदानमा उतारेको थियो ।
यस्तै बुधबार भएको तेस्रो खेलमा संकल्पले नारायण दल गणलाई ट्राइबेकरमा ४–५ गोलले पराजित गर्दै सेमिफाइनलमा प्रवेश गरेको हो ।
निर्धारित समयमा गोलरहित बराबरीमा सकिएपछि खेल ट्राइबेकरमा पुगेको थियो । ट्राइबेकरमा नारायण दलका धिरेन्द्र शाही, दिपक थापा र जग्दिश थारुले गोल गर्न चुक्दा पराजित भोग्नुपर्यो ।
नारायण दलको लागि सुनिल थारु, सुरेश थारु, लोकेश थापा र पुस्कार पौडेलले गोल गरे । संकल्पको लागि मुकुन्द न्यूरे, युनिस तामाङ, मनिष गुरुङ, बिशाल नेपाली र आयुष गुरुङले गोल गरेभने पासाङ तामाङ र भागवत चौधारीको प्रहार बाहिरिएको थियो ।
यस्तै, बुधबार नै भएको पहिलो खेलमा रुद्रेपिपल युवा क्लबलाई ट्राइबेकरमा पराजित गर्दै प्रर्पल हेज क्वाटरफाइनलमा प्रवेश गरेको छ ।
राष्ट्रिय फुटबल टिमका सदस्य आयुष घलान सहित मैदान प्रवेश गरेको प्रर्पल हेज निर्धारित समयमा रुद्रेपिपलसँग २–२ गोलको बराबरीमा रोकिएको थियो ।
सुरुवातबाट आक्रमक खेलेको रुद्रेपिपलको लागि खेलको खेलको २३ औं मिनेटमा मिलन गिरीले गोल गर्दै अग्रता दिलाएका थिए । पहिलो हाफको अतिरिक्त समयमा रुद्रेपिपलका सचिन गुरुङले आत्मघाति गोल गरेका थिए ।
खेलको ३८ औं मिनेटमा सामभेल सुनारले गोल गर्दै प्रर्पललाई २–१ को अग्रता दिलाएपनि ४९ औं मिनेटमा रुद्रेपिपलका आयुष थापाले गोल गरेपछि खेल पेनाल्टी सुटआउटमा धकेलिएको थियो । पेनाल्टीमा प्रर्पल हेजले रुद्रेपिपललाई ४–३ गोलले पराजित गर्यो ।
पेनाल्टीमा रुद्रेपिपलका सचिन गुरुङको प्रहार गोलपोष्टमा लाग्दै बाहिरियोभने आयुष थापाको प्रहार प्रर्पलका गोलरक्षकले बचाएका थिए । रुद्रेपिपलको लागि आशिष गुरुङ, मिलन गिरी र रोशन थापा मगरले गोल गरे । प्रर्पलको लागि सुजल श्रेष्ठ, अजित गुरुङ, रोशन दोङ र अनिष महर्जनले गोल गरे ।
प्रतियोगिता अन्तरगत बिहिबार दुई खेल हुनेछ । बिहिबारको पहिलो खेल आदर्श विद्यामन्दिर र गुठी युनाइटेड विच हुनेछभने दोस्रो खेल चिल्ड्रेन लाईफ स्पोर्टस् क्लब र प्रर्पल हर्ज विच हुने बागलुङ एकता क्लबका अध्यक्ष इन्सान थापाले बताए ।
प्रतियोगिताको विजेता र उपविजेताले क्रमशः १ लाख २२ हजार २ सय २२ रुपैयाँ र ६६ हजार ६ सय ६६ रुपैयाँ, ट्रफी, मेडल र प्रमाणपत्र प्राप्त गर्ने क्लबले जनाएको छ । यस्तै उत्कृष्ट खेलाडीहरुलाई विधागत पुरस्कार प्राप्त गर्नेछन् ।
