खिम बहादुर कार्की
बागलुङ, २३ असोज । बागलुङका खाद्यान्न र पुस्तक पसलहरुबाट पेट्रोलियम पदार्थ विक्री हुने गरेको पाइएको छ ।
काठेखोला गाउँपालिकाले गरेको चाडबाड लक्षित अनुगमनको क्रममा गाउँपालिका भित्रका केही खाद्यान्न र पुस्तक पसलबाट पेट्रोलियम पदार्थ (पेट्रोल)को विक्री वितरण हुने गरेको भेटिएको हो । गाउँपालिका वडा नम्बर ५ का खाद्यान्न पसल र पुस्तक पसलमा बोतल र ड्रममा पेट्रोलियम पदार्थ राखेर विक्री वितरण गरेको भेटिएको गाउँपालिका उपाध्यक्ष तेज बहादुर थापा (तिलक)ले जानकारी दिए । गाउँपालिकामा खाद्यान्न र पुस्तक पसल संचालन गर्न पसल दर्ता गरिएपनि अनुगमनको क्रममा सोही पसलबाट पेट्रोलियम पदार्थ समेत विक्री वितरण गरिरहेको भेटिएको गाउँपालिकाका उपाध्यक्ष थापाले बताए ।
पेट्रोलियम पदार्थ विक्री वितरणको लागि नेपाल आयल नियगमबाट स्विकृत प्राप्त गरेर पेट्रोल पम्प संचालन गर्नुपर्ने हुन्छ तर बागलुङका गाउँ–गाउँमा खुल्ला रुपमा बोतल र ड्रममा पेट्रोलियम पदार्थ राखेर विक्री वितरण गरिदै आएको छ । नेपाल सरकारले बोतलमा पेट्रोलियम पदार्थको विक्रीवितरणमा रोक लगाएपनि त्यसको कार्यान्वयन नभएको अनुगमनको क्रममा भेटिएको हो ।
उपाध्यक्ष थापाले अनुमति नलिइ विक्री भइरहेको पेट्रोलियम पदार्थलाई पसलबाट तत्काल हटाउन निर्देशन दिएको बताए । ‘पहिलो पटक लापरबाही देखिएकोले हामीले तत्काल हटाउन निर्देशन दिएका छौं,’ उपाध्यक्ष थापाले भने,‘नहटाइ अटेरी गरेर विक्री गरेको पाइएमा कानुन बमोजिम कडा कारवाही गछौं ।’
अनुगमनको क्रममा मासु पसल (फ्रेस हाउस)मा मापदण्ड नपुगेको र सोही पसलबाट मादक पदार्थसमेत विक्री भएको पाइएको छ । मासु पसलबाट मादक पदार्थ समेत विक्री भएको भेटिएपछि उपाध्यक्ष थापाको टोलीले एक हप्ताभित्र छुट्टाछुट्टै पसल दर्ता गरेर संचालन गर्न निर्देशन दिएको छ । यस्तै अधिकांश पसलहरु दर्ता भएपनि नविकरण नगरेको पाइएको उपाध्यक्ष थापाले बताए । दर्ता नभएको पसलहरु र नविकरण नगरेका पसलहरुलाई तत्काल दर्ता र नविकरण गर्न अनुगमनको टोलीले निर्देशन दिएको छ । अनुगमनमा मुख्य गरी पेय पदार्थ, तयारी खाद्य पदार्थ, औषधि तथा म्याद गुज्रेका बीउ–बिजनहरुलाई पसलबाट हटाउन लगाइएको थियो ।
दशैं तिहार जस्ता चाडबाडको मुखमा म्याद गुज्रेका तथा गुणस्तरहिन सामग्रीहरु बिक्री हुनसक्ने सम्भावना देखेर काठेखोला गाउँपालिकाका उपाध्यक्ष तेज बहादुर थापा (तिलक)को नेतृत्वमा सोमबार मुख्य बजारहरु वडा नम्बर २ को अक्षेते बजार, वडा नम्बर ६ को सुल्डाडा, इनारपानी, वडा नम्बर ५ को रिजालचोक, पोखरा र घोडाबाँधेमा अनुगमन गरिएको थियो । उपाध्यक्ष थापाले नागरिकहरुलाई खाद्य सुरक्षाको बारेमा जानकारी र सचेतना गराउनुका साथै विक्रेताहरुलाई पनि सजग गराउनको लागि अनुगमन गरिएको बताए । उनले विक्रेताहरुलाई अहिले खाद्य सुरक्षाको बारेमा जानकारी र सचेत गराएको बताउँदै अझैअटेर गरेमा कानुन बमोजिम कारवाही गरिने बताए । कालो बजारी नियन्त्रण तथा खाद्य गुणस्तर कायम गर्ने बजार अनुगमनले सहयोग पुग्ने उपाध्यक्ष थापाको भनाई छ ।
