बागलुङ, ५ मंसिर। बागलुङ निर्वाचन क्षेत्र नम्बर १ को मत गणना आज दिउँसोबाट हुने भएको छ ।
मुख्य निर्वाचन अधिकृतको कार्यालय क्षेत्र नम्बर १ मा राजनीति दल र उम्मेदवारका प्रतिनिधिसहितको सर्वदलिय बैंठकले आज दिउँसो ३ बजेर ३० मिनेटबाट मतगणना गर्ने निर्णय गरेको मुख्य निर्वाचन अधिकृत डा. दिवाकर भट्टले जानकारी दिनुभयो । मतगणना जिल्ला सदरमुकाम बागलुङ बजारमा रहेको जिल्ला समन्वय समितिको सभाहलमा हुनेछ । मतगणना स्थलमा तारजालीको व्यवस्था गरिएको छ ।
बागलुङ क्षेत्र नम्बर १ मा प्रतिनिधिसभा तर्फ सत्ता गठबन्धनबाट राष्ट्रिय जनमोर्चाका चित्र बहादुर केसी, नेकपा एमालेका डा. सुर्यप्रसाद पाठक, राष्ट्रिय स्वतन्त्र पार्टीका खिमानन्द कंडेलको मुख्य प्रतिस्पर्धा रहेको छ । प्रतिनिधिसभा सदस्यका लागि बागलुङ १ मा ६ जनाको उम्मेदवारी परेको छ । जसमध्ये १ जना स्वतन्त्र उम्मेदवार छन् ।
यस्तै क्षेत्र नम्बर १ को प्रदेशसभा सदस्य (क) तर्फ सत्ता गठबन्धनबाट नेपाली काँग्रेसका दिपेन्द्र बहादुर थापा र नेकपा एमालेका हिरा बहादुर केसी विच मुख्य प्रतिस्पर्धा रहेको छ । प्रदेशसभा (क)मा पाँच जनाको उम्मेदवारी परेको छ । जसमध्ये १ जना स्वतन्त्र उम्मेदवार छन् ।
यस्तै प्रदेशसभा सदस्य (ख) तर्फ सत्ता गठबन्धनबाट नेपाली काँग्रेसका डिल्लीराम सुवेदी र नेकपा एमालेका नवराज पौडेल विच प्रतिस्पर्धा रहेको छ । प्रदेशसभा (ख) मा चार जनाको उम्मेदवारी परेको छ । बागलुङ क्षेत्र नम्बर १ मा अस्थायी मतदाता सहित ९७ हजार ४ सय ५८ मतदाता मध्य ५१ हजार ६ सय ६६ (५३.१ प्रतिशत) जनाले मतदान गरेका छन् ।
बागलुङ निर्वाचन क्षेत्र नम्बर २ को मत गणना दिउँसो ३ बजे देखि हुनेछ । मतगणना ढोरपाटन नगरपालिका–१ मा रहेको बुर्तिबाङ नयाँ शहर आयोजनाको सभाहलमा हुने भएको छ । मतगणना स्थलमा तारजालीको व्यवस्था गरिएको छ ।
