बागलुङ, २ बैशाख । बागलुङ नगरपालिका, १४ नारायणस्थानमा प्रधान कार्यालय रहेको बलेवा एकता बचत तथा ऋण सहकारी संस्थाले बागलुङ बजारबाट आफ्ना सेवा दिन सुरु गरेको छ । बागलुङ बजारमा सेवा केन्द्रको उद्घाटन गर्दै सहकारीले सेवा दिन थालेको हो ।
सेवा केन्द्रको उद्घाटन गर्दै राष्ट्रिय सहकारी महासंघकी सञ्चालक तथा जिल्ला सहकारी संघ बागलुङकी अध्यक्ष हुमाकुमारी जिसीले सहकारीले आफ्ना सदस्यहरुसँग मात्रै कारोवार गर्नुपर्नेमा जोड दिईन् । उनले ग्रामिण क्षेत्रमा स्थापना भएर शहरी क्षेत्रमा सेवा केन्द्र बिस्तार गर्नसक्नु बलेवा एकताको सफलता भएको बताईन् ।
सहकारीले स्थापना गरेको यो तेस्रो सदस्य सेवा केन्द्र हो । यसअघी अमलाचौर र पैञ्युपाटामा सेवा केन्द्र स्थापना गरेर सहकारीले सेवा दिँदै आएको छ । २ करोड २५ लाख शेयर पूँजी रहेको सहकारीको बचत २३ करोड र ऋण लगानी पनि २३ करोड रहेको प्रबन्ध भरत पौडेलले बताए । बिहिबार सदस्य सेवा केन्द्रको उद्घाटन समारोह सदस्य सेवा केन्द्रका संयोजक चन्द्रप्रकाश शर्मा गणेशको अध्यक्षता, उपाध्यक्ष टिकाराम शर्माको स्वागत र सचिव तारानाथ आचार्यको सञ्चालनमा सम्पन्न भएको थियो ।
सहकारीले ३० वटा भन्दा धेरै बिप्रेसण कम्पनीहरुसँग कारोवार समेत गर्दै आएको छ ।
