बागलुङ, ३० कात्तिक । सामाजिक सञ्जालमा चर्चा पाएको जीर्ण पुलको अस्थायी मर्मत गरिएको छ । काठेखोला–७ रेश र वडा नम्बर ८ लेखानी जोड्ने ढुङ्गे विसौनाको झोलुङ्गे पुल अनेरास्ववियु बागलुङले मर्मत गरेको हो ।
अनेरास्ववियुका बागलुङ जिल्ला संयोजक रोसन कुँवरको नेतृत्वमा गएको युवाहरुले अत्यन्तै जीर्ण रहेको झोलुङ्गे पुलको अस्थायी रुपमा बाँसको प्रयोग गरी मर्मत गरिएको छ ।
अनेरास्ववियुको विपदमा साहरा, विभेदमा बिद्रोह कार्यक्रम अन्र्तगत जीर्ण भएर सामाजिक सञ्जालमा चर्चामा पाएको उक्त पुलको मर्मत भएको अनेरास्ववियु बागलुङका सचिवालय सदस्यका रोशन जिसीले जानकारी दिनुभयो । जीर्ण पुल पक्की बनाउने गरी बजेट बिनियोजन भइसकेको काठेखोला गाउँपालिका–७ रेशका वडा अध्यक्ष प्रेम लामिछानेले जानकारी दिनुभयो । बजेट विनियोजन भइसकेको छ, स्थानीय पुलको अवस्थाका बारेमा जानकारी नगराएका कारण जिर्ण अवस्थाकै पुलबाट ओहोर दोहोर गर्नु परेको लामिछानेको भनाइ छ ।
सामाजिक सञ्जालमा भत्केको पुलमा जोखिम मोलेर विद्यार्थी खोला तर्दै गरेको दृश्य भाइरल भए लगत्तै अनेरास्ववियुले पुलको मर्मत गरेको हो भने वडा कार्यालयलाई पुलको संरचना परिवर्तन गर्न ध्यानआर्कषण समेत गरेको छ । पुल मर्मतमा अनेरास्ववियु बागलुङका संयोजक रोशन कुँवर, जिल्ला सचिवालय सदस्य रोशन जिसी, जिल्ला सदस्य सुनिल पौडेल र राष्ट्रिय युवा संघ रेशका अध्यक्ष बुद्धि कार्की लगायको सहभागीता रहेको थियो ।
