२६ भदौ, बागलुङ । बारीमा काम गरिरहँदा खसेको पहिरोले पुर्दा बागलुङका एक युवकको मृत्यु भएको छ । बडिगाड गाउँपालिका–१० का ३५ वर्षीय दानबहादुर घर्ती शुक्रबार दिउँसो ४ बजे मृत भेटिएका हुन् ।
शुक्रबार बिहान उनी पहिरोमा पुरिएको खबर आएपछि प्रहरी र स्थानीयले खोजी गरेका थिए । दिनभरि बारीमै खोजी गर्दा नभेटेपछि खोलातर्फ खोज्न जाँदा उनको शव भेटिएको इलाका प्रहरी कार्यालय बुर्तिवाङका प्रहरी निरीक्षक प्रकाश सिंह भण्डारीले बताए ।
मृतकको शव प्राथमिक स्वास्थ्य केन्द्र बुर्तिवाङमा पोष्टमार्टम पछि परिवारलाई बुझाइनेछ । मृतक घर्तीका श्रीमती, २ छोरी र एक छोरा छन् ।
