बागलुङ, १५ जेठ । जिल्लाको तमानखोला गाउँपालिका सामाजिक सेवामा उदाहरणीय बन्दै गएको छ ।
आर्थिक अवस्था कमजोर भएका, असहाय तथा विपन्न बालबालिकालाई सहयोग गर्दै गाउँपालिकाले मानवीय सेवाको भावना झल्काएको हो । शिक्षा, स्वास्थ्य, राहत तथा विभिन्न सामाजिक कार्यक्रममार्फत तमानखोलाले स्थानीय बालबालिकाको जीवनस्तर सुधारमा महत्वपूर्ण भूमिका खेल्दै आएको छ ।
बालबालिकाका लागि तमानखोला गाउँपालिकाले आफ्नै बालगृह बनाएर खाने–बस्ने व्यवस्थासहित वडा नं. ३ को तमान गाउँमा रहेको धनगौज्योति माविमा पढ्ने व्यवस्थापन समेत गराएको तमानखोला गाउँपालिकाका अध्यक्ष जोकलाल बुढाले बताउनुभयो
गाउँपालिकाले अलपत्र भेटिएका, अभिभावकविहीन र अति बिपन्नताको कारण पढ्न नपाएका, खानेबस्ने समस्या भएका बालबालिका खोजेर बालगृहमा राख्दै आएकोे छ । तमान गाउँको तीनवटा घर भाडामा ५ वर्षदेखि बालगृह सञ्चालनमा ल्याइएको छ ।‘संविधानमा बालबालिकाको हकको व्यवस्था छ, तर यो व्यवस्था अनुसार उनीहरुले बाँच्न, पढ्न लेख्न र अभिभावक पाउनुपर्ने बताउनुभयो ।
\नियमित खर्च गर्नुपर्ने भएकोले यो कार्यलाई पालिकाले आफ्नो नियमित बजेटमा समावेश गर्दै आएको छ ।
गाउँपालिकाले खाना बनाउने, स्याहार सुसार गर्ने तीन जना कर्मचारी राखेर १८ जना बालबालिका बालबालिका राख्न थालिएको थियो ।
हरेक वर्ष बालबालिकालाई खाद्यानको व्यवस्था पालिकाले गर्दै आएको छ भने विभिन्न संघसंस्था, लायन्स क्लबलगायतले यहाँ आएर बालबालिकालाई शैक्षिक सामाग्री, पोशाक वितरण गर्दै आएका छन् ।
पालिकाले परोपकारी काम र बालबालिकाको उज्वल भविष्यका लागि काम गरेको भन्दै वडा अध्यक्ष झकबहादुर बुढाले भने यो नमूना काम भएको बताउनुभयो ।
गाउँपालिकाको नमूना र बालबालिकाको अधिकार सुरक्षाको काम रहेकाले जो सुकैले जानकारी दिएपनि हामी गएर बालबालिका ल्याएर राख्ने र सहयोग गर्ने बुढाले बताउनुभयो ।बाढी पहिरोले घरबारविहिन भएका, दुर्घटना वा अन्य कारणले अभिभावक गुमाएका बालबालिका यहाँ आउँदा साथी पाएर रमाएका छन् ।
उनीहरुलाई बेला बेला घुमाउने, खेल खेल्ने व्यवस्था गरिदिने जस्ता काम पनि गरिएको छ । विद्यालयमा पनि यी बालबालिकालाई सम्मानपूर्वक पढ्न पाउने व्यवस्थापनका लागि आग्रह गरिएको छ ।उनीहरुलाई कुनै पनि अपमानित नहुने बरु थप सम्मान र हौसला प्रदान गर्ने गरी पढाउन लगाइएको गाउँपालिका अध्यक्ष बुढाले बताउनुभयो ।
यो कामलाई अब आउने जनप्रतिनिधिले पनि निरन्तरता दिने गरी कार्यविधि समेत बनाइएको छ । यहाँका बालबालिकाको अवस्थाबारे विभिन्न संघसंस्थालाई अध्ययन गर्न, अनुगमन गरी सुझाव पेश गर्न पनि लगाइने गरिएको छ । उनीहरुलाई कक्षा १२ सम्म पढ्नका लागि पालिकाले साथ दिने र गाउँकै विद्यालयमा पढ्ने अबसर दिइनेछ ।
