बागलुङ, २० फागुन । बागलुङमा हुने प्रतिनिधि सभा सदस्य निर्वाचनका लागि जिल्लाभर मतदान केन्द्र तयार पारिएको छ । जिल्लाका दुई निर्वाचन क्षेत्रका दश स्थानीय तहमा २३० मतदान केन्द्रमा आवश्यक तयारी पूरा भएको हो ।
निर्वाचनका लाथि बुथ निर्माण गर्ने, मतदानका लागि लाइन लाग्नका लागि डोरी टाङ्ने लगायत आवश्यक सम्पूर्ण काम सकिएको छ । मतदानको प्रक्रिया मात्रै बाँकी रहेको मुख्य निर्वाचन कार्यालय बागलुङले जनाएको छ ।
जिल्लाभर बिहीबार बिहान ७ बजेदेखि मतदान प्रारम्भ हुने भएपछि बुधबार नै आवश्यक सबै पूर्वाधारका काम सम्पन्न गरिएको मुख्य निर्वाचन अधिकृतको कार्यालयले जनाएको छ । मतदानस्थलमा खटिएका कर्मचारीसहित सुरक्षा निकायको कडा सुरक्षा रहेको छ । भौगोलिक विकटता, मौसमी जटिलताका कारण हुनसक्ने समस्यालाई मध्यनजर गरी थप तयारी समेत गरिएको छ ।
मतदान केन्द्र खटिएका मतदान अधिकृत, सहायक मतदान अधिकृत सहित कर्मचारीमा कुनै समस्या नदेखिएको मुख्य निर्वाचन अधिकृत सीता शर्मा अधिकारीले बताउँनुभयो।
निर्वाचन आचारसंहिताअनुसार फागुन १८ गते राती १२ बजेदेखि मतदान सम्पन्न नहुँदासम्म कुनै पनि प्रकारको प्रचार–प्रसार, सभा–जुलुस, नारा, सामाजिक सञ्जालमार्फत मत माग्ने कार्य पूर्ण रूपमा निषेध गरिएको छ ।
शान्तिपूर्ण, निष्पक्ष र भयरहित मतदान सुनिश्चित गर्न सुरक्षा व्यवस्था कडा बनाइएको छ । निर्वाचन प्रहरी सँगसँगै नेपाल प्रहरी, सशस्त्र प्रहरी र नेपाली सेनाको संयुक्त टोली परिचालन गरिएको छ ।
बागलुङ क्षेत्र नं. १ मा एमालेका उम्मेदवार हिरा बहादुर के.सी., नेपाली काँग्रेसका उम्मेदवार भीम श्रीस, राष्ट्रिय जनमोर्चा र नेपाली कम्युनिष्ट पार्टीको गठबन्धनका उम्मेदवार कृष्ण प्रसाद शर्मा अधिकारी, राष्ट्रिय स्वतन्त्र पार्टीका उम्मेदवार सुशिल खड्का र राष्ट्रिय प्रजातन्त्र पार्टीका उम्मेदवार कल्याण विक्रम आचार्य उम्मेदवार रहेका छन् भने बागलुङ क्षेत्र नं. २ मा एमालेका उम्मेदवार मञ्जु शर्मा चालिसे, नेपाली काँग्रेसका उम्मेदवार टेकराज पौडेल, नेकपाका ज्ञामनाथ गैह्रे, रास्वपाका सोमनाथ शर्मा लगायतका उम्मेदवारहरु चुनाबी प्रतिस्पर्धामा रहेका छन् ।
बागलुङमा १०७ मतदानस्थल र २३० मतदान केन्द्र रहेका छन् भने दुईओटा अस्थायी मतदान केन्द्र तोकिएका छन् । जिल्लामा ९८ हजार ५७४ पुरुष, ९४ हजार ८०६ महिला र अन्य एक गरी कुल एक लाख ९३ हजार ३८१ मतदाता रहेका छन् ।
निर्वाचन सम्पन्न गराउन २३२ मतदान अधिकृत, २३२ सहायक मतदान अधिकृतसहित एक हजार ३८० जना कर्मचारी र सुरक्षाकर्मी कार्यक्षेत्रमा खटिसकेका छन् ।
बागलुङका दुई प्रतिनिधिसभा सदस्यका लागि २३ जना उम्मेदवार चुनावी मैदानमा छन् ।
