बागलुङ ७ माघ । उत्पादनमुलक सहकारी संस्थाहरुको लागि बागलुङमा व्यवसायिक योजना तर्जुमा तथा क्षमता विकास तालिम सुरु भएको छ ।
बागलुङ दुग्ध उत्पादक सहकारी संघको समन्वय तथा सहकारी रजि«स्टारको कार्यालयको आयोजनामा तीन दिने तालिमको मंगलबारदेखि शुभारम्भ गरिएको हो ।
तालिमको उद्घाटन गर्दै बागलुङ नगरपालिकाका नगरप्रमुख बसन्तकुमार श्रेष्ठले बागलुङ नगरपालिकाले व्यवसायिक कृषि क्षेत्रको बिकासका लागि नगरपालिकाले प्राथमिकताका साथ नीति तथा कार्यक्रम निर्माण गरेको बताउनुभयो ।
उहाँले कृषकको सहजीकरणका लागि बिना धितो ऋण, गोठ सुधार, घास उत्पादनका लागि बिउ तथा विरुवा वितरण, विभिन्न आधुनिक औजार वितरण लगायका कार्य गर्दै आएको बताउनुभयो । किसानले उत्पादन गरेका वस्तुका लागि बागलुङमा बजारीकरणको समस्या नरहेको उहाँको भनाई थियो । जिल्ला सहकारी सघंका अध्यक्ष खिमबहादुर कार्कीले विभिन्न खाले तालिम मार्फत किसानलाई सबल, सक्षम र उत्पादनमुखी बनाउनुपर्ने बताउनुभयो ।
सहकारी रजि«स्टार भेषराज रिजालको अध्यक्षता, बागलुङ दुग्ध उत्पादक सहकारी संघका अध्यक्ष दिपक गौतमको स्वागत र सहकारी रजि«स्टारको कार्यालयका प्रमुख प्रशासकिय अधिकृत नारायणप्रसाद ढकालको सञ्चालनमा कार्यक्रमको उद्घाटन सत्रको समापन भएको थियो ।
