बागलुङ, १ मंसिर । मानवसेवा आश्रम बागलुङको भवन निर्माणार्थ संचालित श्रीमद् भागवत सप्ताह ज्ञानविज्ञान महायज्ञमा नौ करोड सत्तरी लाख रुपैयाँ संकलन गरिएको छ ।
शनिबार सम्पन्न महायज्ञमा ९ करोड ७० लाख दान संकलन भएको हो । सुरुवतमा शुक्रबार महायज्ञ सम्पन्न गरिने भनिएतापनि अन्तिम समयमा आयोजकले एक दिन महायज्ञ थप गरेको थियो । अन्तिम दिन शनिबारमात्रै ७५ लाख रुपियाँ दान संकलन भएको महायज्ञ आयोजक समितिकी कोषाध्यक्ष सरिता गौतमले बताउनुभयो ।
कोषाध्यक्ष गौतमले महायज्ञबाट १० करोड संकलन गर्ने लक्ष्य राखिएको बताउँदै शनिबारसम्म प्राप्त रकम लक्ष्य नजिक पुगेको उल्लेख गर्नुभयो । उहाँले अनलाइन मार्फत सहयोग आउने क्रम निरन्तर जारी रहेका कारण कुल रकम १० करोड पुग्ने विश्वास व्यक्त गर्नुभयो ।
महायज्ञमा दाताहरूले न्यूनतम रकम १ हजारदेखि ११ लाखसम्म दान गरेका छन् । मानवीय सेवा सरिक हुँदै मनकारी दाताहरूले गक्ष्य अनुसारको दान गरिरहेको महायज्ञका कोषाध्यक्ष सरिता गौतमले बताउनुभयो ।
सडकआश्रित, असहाय, अपाङ्ग, मानसिक रोगी तथा बेघर मानवको पुनस्र्थापनाका लागि निर्माणाधीन आश्रमको भवनमा सहयोग पुग्ने उद्देश्यले आयोजना गरिएको यस महायज्ञमा दाताहरूको उल्लेखनीय सहभागिता रहँदै आएको छ ।
महायज्ञमा बागलुङ, पर्वत, म्याग्दी लगायतका विभिन्न जिल्लाका भक्तजनका साथै विदेशमा देशविदेशमा रहेका नेपाली संघसंस्था तथा सहयोगी व्यक्तिहरूले नगद, क्युआर कोड र अन्य माध्यममार्फत सहयोग प्रदान गरिरहेको कोषाध्यक्ष गौतमले बताउनुभयो । आश्रमको एक कोठा निर्माण खर्च ५ लाख ११ हजार पर्ने भएकाले संस्थागत रूपमा समेत उल्लेखनीय सहयोग प्राप्त भएको आश्रमले जनाएको छ ।
मानवसेवा आश्रमका केन्द्रीय अध्यक्ष रामजी अधिकारीले महायज्ञबाट संकलित रकम सडक आश्रित, असहाय, अपाङ्ग, मानसिक रोगी तथा घरबारविहीन व्यक्तिहरूको पुनस्र्थापनाका लागि बागलुङ निर्माणाधिन मानवसेवा आश्रम बागलुङको भवन निर्माणमा लगानी गरिने बताउनुभयो । भवन निर्माणबाट बाँकी रहने रकमबाट अक्षयकोष निर्माण गरिने र अक्षयकोष १० करोड बराबर पु¥याउने लक्ष्य लिइएको उहाँको भनाई छ ।
मानव सेवा आश्रम बागलुङको निर्माणाधिन भवनमा हालसम्म करिब ५ करोड रुपैयाँ खर्च भइसकेको र कार्य सम्पन्न गर्नका लागि अझै ४ करोड रुपैयाँको आवश्यकता रहेको अधिकारीले जानकारी दिनुभयो । निर्माणाधीन भवनको करिब ६० प्रतिशत काम सकिएको र बाँकी ४० प्रतिशत कार्य चैत मसान्तसम्म पूरा गर्ने लक्ष्य रहेको आश्रमले जनाएको छ ।
भवन निर्माण सम्पन्न भएपछि सो शाखाबाट करिब २ सय जनालाई आश्रय प्रदान गर्न सकिने जनाइएको छ ।
विसं २०७३ देखि बागलुङको शाखा स्थापना गरेर सेवा दिँदै आएको आश्रमले बागलुङ नगरपालिका–४ निरयघाटमा जग्गा प्राप्त गरेपछि वि.सं. २०७८ वैशाख २४ गतेदेखि ५ रोपनी क्षेत्रफलमा सुविधा सम्पन्न भवन निर्माण भइरहेको छ ।
महायज्ञ मूल आयोजक समितिका संयोजक सहदेव राजभण्डारीले दाताहरूको सहभागीता, मनकारी भावना र सेवा–मूल्यप्रति देखिएको उत्साहले महायज्ञ ऐतिहासिक रूपमा सफल भएको बताउनुभयो । कार्तिक २१ गतेबाट संचालित महायज्ञमा भागवत भाष्कर कमलनयन गौतम प्रमुख कथावाचक गर्नुभएको थियो ।
