सुजन रेग्मी
बागलुङ, १० असोज । बागलुङमा अखाद्य वस्तुबाट उपभोक्ता जोगाउन बजार अनुगमन गर्न थालिएको छ ।
नेपालीहरुका महान पर्वहरु दसैँ, तिहार लगायतका चाँडपर्वका बेला बजारमा झिनियाको माग र खपत बढ्छ । अन्य समयमा भन्दा रङ मिसिएका अन्य खाद्य सामग्री पनि यो बेला बढी नै प्रयोगमा आउँछन् ।
अखाद्य रंग प्रयोग गरिएका खानाहरुबाट दीर्घकालिन रुपमा प्राणघातक रोगको समेत संक्रमण हुने सचेतनासहित बागलुङ बजारमा धमाधम बजार अनुगमन गर्न थालिएको छ ।
बागलुङ नगरपालिकाको संयोजनमा अनुगमनमा निस्किएको सरोकारवालाको समूहले बजारका खाद्यान्न, माछा, मासु, फलफूल तथा तरकारी पसलहरुमा पुगेर अनुगमन गरिरहेको छ ।
अनुगमनका क्रममा उपभोक्ता हितको ख्याल गर्न, राज्यका नियम कानूनको पालना गरेर मात्रै दैनिक उपभोग्य वस्तुको खरिद बिक्रि गर्न आग्रह गरिएको उपभोक्ता मञ्चका अध्यक्ष शैलेन्द्र कुमार श्रेष्ठले बताए ।
बिहिबार गरिएको अनुगमनमा मासु पसलमा मासु फोहोर भेटिएको, पसलहरुमा अखाद्य रंग मिसिएका झिनिया लगायतका खाद्य सामग्री भेटिएको बागलुङ नगरपालिकाका राजश्व शाखा अधिकृत सरस्वती रेग्मीले बताईन् ।
