बागलुङ १७ साउन । सामाजिक कार्य तथा युवाहरुको नेतृत्व बिकासमा सक्रिय भूमिका निर्वाह गर्दै आएको रोट्रयाक्ट क्लव अफ बागलुङको १५ औँ पदस्थापना कार्यक्रम सम्पन्न भएको छ । क्लवले १५ औ अध्यक्षको रुपमा सुनिल गौतमलाई पाएको छ ।
रोटा वर्ष २०२५|०२६ का लागि अध्यक्षमा चयन भएका गौतमलाई रोटा वर्ष २०२४|०२५ का अध्यक्ष सौरव केसीले पदभार हस्तान्तरण गरेका छन् । १५ औ पदस्थापना समारोहमा गौतम लगायत अन्य पदाधिकारीहरुले पनि पदभार ग्रहण गरेका हुन् ।
कार्यक्रमको उद्घाटन रोटरी डिस्ट्रिक ३२९२ नेपाल अन्तर्गत जोन २१ का असिस्टेन्ट गर्भनर भवनराज बरालले गरेका थिए । उद्घाटन समारोहमा बोल्दै बरालले रोट्रयाक्ट क्लवले रोटरीले निर्धारण गरेका लक्ष्य र कार्यलाई पूरा गर्न सहयोगी भूमिका निर्वाह गरेको बताए । उनले क्लवले सामाजिक कार्यसंगै विभिन्न रचनात्मक तथा युवाहरुको क्षमता बिकासको क्षेत्रमा काम गरेर समाजमा छुट्टै पहिचान पनि बनाएको जनाए ।
कार्यक्रममा रोटरी क्लव अफ बागलुङका अध्यक्ष नारायणप्रसाद गौतम, रोट्रयाक्ट क्लव जोन १६ का जेडआरआर श्रीनाथ बाग्ले, रोट्रयाक्ट क्लव अफ गल्कोटका अध्यक्ष नविन सुवेदी, पत्रकार महासंघका सदस्य संगम घर्ती मगर लगायतले शुभकामना मन्तव्य राखेका थिए ।
अध्यक्ष गौतमले स्विकारोक्तिसहित प्रतिबद्धता मन्तव्य व्यक्त गरेका थिए । अध्यक्ष गौतमको बारेमा क्लवका पूर्व अध्यक्ष ताराप्रसाद शर्माले जानकारी गराएका थिए । कार्यक्रममा रोटा वर्ष २०२४|२५ का अध्यक्ष सौरव केसीले आफ्नो कार्यकाल सफल पार्न सहयोग गर्नेहरुलाई धन्यवादसहित सम्मान गरेका थिए ।
कार्यक्रम रोटा वर्ष २०२४|२५ का अध्यक्ष सौरव केसीको अध्यक्षता, उपाध्यक्ष किशोर सापकोटाको स्वागत, सचिव मनोज गौतम र कोषाध्यक्ष अस्मित कार्कीको सञ्चालनमा सम्पन्न भएको थियो ।
