बागलुङ, ११ असार । बागलुङको पुरानो नगरपालिका बागलुङ नगरपालिकाले आगामी आर्थिक वर्षको लागि एक अर्व ३० करोडको बजेट विनियोजन गरेको छ ।
नगरपालिकाको १७औँ नगरसभामा मंगलबार नगरउपप्रमुख राजु खड्काले आ.व. २०८२/८३ को लागि एक अर्व ३० करोड ९५ लाख ५८ हजार ५ सय ६९ रुपियाँ बजेट प्रस्तुत गर्नुभयो । उपप्रमुख खड्काले आर्थिक विकासतर्फ २ करोड ९७ लाख, पूर्वाधार विकासतर्फ ३९ करोड ५१ लाख ३९ हजार दुई सय ८० रुपियाँ, सामाजिक विकासतर्फ ६४ करोड ४१ लाख ४४ हजार नौ सय २० रुपियाँ, कार्यालय संचालन तथा प्रशासनिक खर्च १७ करोड २४ लाख ४० हजार रुपियाँ र सुशासन तथा अन्तरसम्बन्धित क्षेत्रतर्फ ६ करोड ८१ लाख ३४ हजार तीन सय ६९ रुपियाँ बजेट विनियोजन गर्नुभएको छ ।
नगरपालिकाले नगरस्तरीय पूर्वाधार निर्माणका लागि तीन करोड रुपियाँ र वडा नम्बर १ देखि १४ नं. वडाका साना पूर्वाधार निर्माण तथा वडा स्तरीय कार्यक्रम संचालनका लागि ६ करोड ४० लाख रुपियाँ विनियोजन गरेको छ ।
वडा नं. १३ पैयुँपाटामा १५ शैयाको नगर अस्पतालको भवन निर्माण सम्पन्न गर्न, बजारक्षेत्रको दोहोरो नाली र फुटपाथ सहितको सडक व्यवस्थापन र बालमैत्री स्थानीय शासनको दिगोपना लगायतका कार्यक्रम बजेटमा समावेश छन् ।
नगरपालिकाले बजारका उपयुक्त स्थानमा कपडा बैंक स्थापना, आत्मनिर्भर बागलुङ कार्यक्रमलाई बजेट विनियोजित गरेको उपप्रमुख खड्काले प्रस्तुत गर्नुभयो ।
