बागलुङ, १६ जेठ । बागलुङमा दोस्रो संस्करणको एसईई स्तरीय आदर्श कप पुरुष तथा महिला फुटबल प्रतियोगितामा गरिमा र न्यू ओयसिसले विजयी सुरुवात गरेका छन् ।
प्रतियोगिताको छात्र तर्फ गरिमा आवासिय माध्यमिक विद्यालयले विजयी सुरुवात गरेको छ । उद्घाटन खेलमा गरिमाले फ्युचर ब्राइटर माध्यमिक विद्यालयलाई पराजित गर्यो ।
खेलको १८ औं मिनेटमा फ्युचरका निशान कार्कीले गोल गर्दै अग्रता दिलाएपनि गरिमाका अप्सन केसीले दोस्रो हाफको १० औं मिनेटमा गोल गर्दै खेल बराबरी गरेका थिए । निर्धारित समय १–१ गोलको बराबरीमा भएपछि खेल पेनाल्टी सुट आउटमा धकेलिएको थियो ।
पेनाल्टीमा गरिमाले फ्युचरलाई ४–३ गोलअन्तरले पराजित गर्यो । पेनाल्टीमा गरिमाको लागि अप्सन गौतम, गगन थापा, प्रिन्स कुँवर र चिराग रोकाले गोल गर्दा सविन थापाको प्रहार बाहिरिएको थियो । फ्युचरको लागि निशान कार्की, भोज बहादुर नेपाली, आशिष सुनारले गोल गरे । फ्युचरका आयुश कुँवरको प्रहार बाहिरियो भने अरुण भण्डारीको प्रहार गरिमाका गोलरक्षक दिप घर्तीले रोकेका थिए ।
यस्तै छात्रा तर्फ न्यू ओयसिस एकेडेमीले जित निकाल्दै सेमिफाइनलमा प्रवेश गरेको छ । ओयसिसले धौलागिरी आवासीय माध्यमिक विद्यालयलाई १–० गोलअन्तरले पराजित गर्यो । आयुषा आलेले खेलको इन्जुरी समयमा गरेको गोल नै ओयसिसको जितमा निर्णायक गोल बन्यो ।
प्रतियोगिताको दोस्रो दिन शुक्रबार छात्रतर्फ न्यू एभरेष्ट एकेडेमीविरुद्व रुद्रेपिपल, आयोजक आदर्श विद्यामन्दिर माध्यमिक विद्यालय ‘निलो’विरुद्व न्यू ओयसिस र चिल्ड्रेन लाइफ बोर्डिङ स्कुलविरुद्व अमर आदर्श माध्यमिक विद्यालयले खेल्ने छन् भने छात्रातर्फ फ्युचरविरुद्व रुद्रेपिपल माध्यमिक विद्यालय र आदर्श विद्यामन्दिर माध्यमिक विद्यालय विरुद्व विद्यामन्दिर माध्यमिक विद्यालयले प्रतिस्पर्धा गर्नेछन् ।
प्रतियोगिताको उद्घाटन बागलुङ नगरपालिकाका उपप्रमुख राजु खड्काले गर्नुभएको थियो । उद्घाटन पछि बोल्दै उपप्रमुख खड्काले प्रतियोगिता खेलाडीको क्षमता अभिवृद्धिका लागि महत्वपूर्ण रहेको बताउनुभयो । उहाँले निजी विद्यालयले सामाजिक र खेलकुद क्षेत्रमा अघि सरेकोमा खुसी व्यक्त गर्नुभयो ।
उद्घाटन सत्रमा बागलुङ नगरपालिका वडा नं. २ का अध्यक्ष एवम् नगर खेलकुद विकास समितिका संयोजक सुरज बोसेल र नगर शिक्षा अधिकारी धनप्रसाद पोखरेलले शुभकामना मन्तव्य व्यक्त गर्नुभएको थियो । आदर्श स्पोर्टस क्लबका अध्यक्ष राजेश के.सी.को अध्यक्षतामा सम्पनन भएको उद्घाटन समारोहमा शिक्षिका जुना के.सी.ले स्वागत मन्तव्य र क्लबका उपाध्यक्ष युनिस मियाँले सञ्चालन गर्नुभएको थियो ।
आदर्श स्पोर्टस् क्लबले आयोजना गरेको प्रतियोगिता जेठ २० गतेसम्म बागलुङ नगरपालिका–१ स्थित बाङ्गेचौर खेलमैदानमा संचालन हुनेछ ।
