बागलुङ, २३ चैत । चैत्राष्टमीको दिन बागलुङ कालिका भगवती मन्दिरमा भक्तजनहरुको भीड लागेको छ । चैते दशैं समेत भनिने नवरात्र पर्वको मुख्यदिन शनिबार चैत्राष्टमी पर्वको दिन मन्दिरमा भक्तजनहरुको घुइँचो लागेको हो ।
बागलुङ कालिकामा पूजाअर्चना गर्नाले मनोकाङ्क्षा पूरा हुने विश्वासका साथ देशभरका हिन्दु धर्मावलम्बीहरु मन्दिरमा आउने गरेको अध्यक्ष खड्काले बताउनुभयो ।
चैत्राष्टमीको दिन काठमाडौँ, पोखरा, पर्वत, म्याग्दी, चितवन लगायत देशभरबाट मन्दिर दर्शनका आएका छन् । पछिल्लो समय चैत्राष्टमीको बेला १०, १५ प्रतिशत भारतीय भक्तजनहरु पनि वृद्धि भएको अध्यक्ष खड्काले बताउनुभयो ।
कालिका मन्दिरमा महाष्टमी र महानवमीको दिन विशेष प्रकारले बलि दिएर पूजा गर्ने चलन छ । मन्दिरमा कुखुरा, हाँस, सुँगुर, बोका र राँगोसमेत बलि दिइन्छ । पछिल्लो समय परेवा बलिमा भने रोक लगाइएको छ ।
मन्दिर पाल्पाका राजा मुकुन्दसेनले आफ्नी छोरीको विवाह तत्कालीन पर्वतका राजा प्रतापनारायण मल्लसँग १५९१ मा गरिदिएपछि छोरीले माझकी देवीलाई पनि दाइजोको रुपमा बुबासँग मागेर आफूसँगै ल्याएको र कालीगण्डकी नदी किनारमा विधिपूर्वक स्थापना गरेको इतिहास रहेको अध्यक्ष खड्काले बताउनुभयो ।
कालिका भगवती मन्दिरमा बर्षको दुई पटक चैते दशैं र वडा दशैंमा दर्शनार्थीहरुको भिड लाग्ने गर्दछ । मन्दिरमा माघ र साउन महिना बाहेक वर्षभरी नै दर्शनार्थीको चहलपहल हुने गर्दछ । मन्दिरमा प्रत्येक मंगलबार, शनिबार र अष्टमी लगायत विभिन्न तिथीहरुमा भक्तजनहरुको बढी भिड् लाग्ने अध्यक्ष खड्काले बताउनुभयो ।
चैत्राष्टमीको अवसरमा गुठी व्यवस्थापन समितिले मन्दिर परिसरमा ऐतिहासिक चैत्राष्टमी मेला संचालन गरेको छ । चैत २० गतेदेखि सुरु भएको मेलामा भलिबल प्रतियोगिता, लोकदोहोरी गीत प्रतियोगिता, खुल्ला छेलो फाल्ने प्रतियोगिता संचालन भएका छन् । मेला चैत २५ गतेसम्म संचालन हुने अध्यक्ष खड्काले बताउनुभयो ।
