बागलुङ, १९ फागुन । पूर्व राजा ज्ञानेन्द्र शाह फागुन २१ गते बुधबार बागलुङ आउने भएका छन् ।
नेपालको प्रमुख शक्तिपीठ बागलुङ कालीका भगवती मन्दिरको दर्शन गर्न पूर्वराजा शाह बागलुङ आउने कार्यक्रम तय भएको हो । धार्मिक यात्राको लागि बागलुङ आउँदै गरेका पूर्वराजालाई स्वागत गर्नको लागि जब्बर बहादुर लामिछानेको संयोजकत्वमा ५ सय १ सदस्यीय नागरिक स्वागत मुल समारोह समिति गठन गरिएको छ ।
मन्दिर दर्शन गर्नको लागि शाह बागलुङ आउने तय भएको नागरिक स्वागत मुल समारोह समितिले आईतबार पत्रकार सम्मेलन गरेर जानकारी गराएको छ । समितिका अध्यक्ष लामिछानेले पूर्व राजा शाहले बागलुङको कालीका भगवती मन्दिरको दर्शन पछि म्याग्दीको गलेश्वर मन्दिरको दर्शन गर्न जाने कार्यक्रम रहेको बताउनुभयो । ‘पूर्व राजा शाहले कालीका भगवती मन्दिरमा पुजाआजा गर्नुहुनेछ,’ लामिछानेले भन्नुभयो,‘मन्दिरमा पुजाआजा पछि म्याग्दी जिल्लाको गलेश्वर मन्दिरमा पुजाआजा गर्ने कार्यक्रम रहेको छ । त्यसपछि उहाँ पोखरा फर्किनुहुनेछ ।’
स्वागत मुल समारोह समितिले बागलुङमा पूर्व राजाको भव्य स्वागतको लागि तयारी गरेको छ । भव्य स्वागतको लागि केशव कार्कीको संयोजकत्वमा प्रचारप्रसार उपसमिति, विवेक हमालको संयोजकत्वमा आर्थिक उपसमिति र गोविन्द पन्तको संयोजकत्वमा स्वयंसेवक व्यवस्थापन उपसमिति गठन गरिएको छ ।
